Notícies Veir istoric
Er Ajuntament de Vielha e Mijaran a liurat, aguest maitin, es exemplars deth libre “Netó: Era legenda der Aneto” ar alumnat dera Escòla Garona, includit en projècte Interreg-POCTEFA
Damb aguesta publicacion es alumnes poiràn desvolopar diuèrses activitats lectiues en tot profitar era transmission d’un bocin dera lengua orau e des tradicions deth Pirenèu
Er Ajuntament de Vielha e Mijaran a liurat aguest maitin eth libre “Netó: Era legenda der Aneto”, ar alumnat dera Escòla Garona. Aguesta publicacion tracte sus ua legenda qu’a ara montanha pirenenca coma èish vertebrador dera istòria. Aguesta accion ei includida laguens deth projècte Interreg-POCTEFA “Reiaume der Aneto” en qu’i participen Benasc, Luishon e Vielha e Mijaran. En aguest sens, eth libre s’a editat en benasqués, occitan e aranés, coma mòstra de respècte as lengües oficiaus des diuèrsi sòcis deth projècte, en tot promòir era sua difusion.
En çò que tanh ara publicacion deth tèxte en aranés, aguesta a estat amiada a tèrme peth departament de politica lingüistica deth Conselh Generau d’Aran.
Er alumnat poirà realizar desparières activitats lectiues en tot méter en valor era cultura orau (a trauès d’ua legenda) e era lengua oficiau de cadun des territòris que prenen part deth projècte, que son minoritàries, e que s’an de suenhar e promòir (benasqués, occitan e aranés).
“Èm fòrça satisfèts qu’es alumnes dera Escòla Garona poguen gaudir d’aguest libre, en tot realizar activitats, en un format fòrça atractiu entà da eri e, qu’entre d’autes lengües, se trape en aranés”, comente eth dusau tinent d’alcalde e còsso d’ensenhament e joenessa de Vielha e Mijaran, Alberto López.
17/02/2021