Notícies Veir istoric
Er Ajuntament de Vielha e Mijaran met eth Centre de Joenessa “Antara” a disposicion d’Aran Salut e deth Conselh Generau d’Aran entara campanha de vacunacion dera gent grana dependenta
Des der inici dera pandémia dera COVID-19, eth consistòri a mostrat era volontat d’ajudar ena luta contra aguesta malautia, en tot aufrir es diuèrsi equipaments municipaus as autoritats sanitàries entà tot çò que sigue de besonh
Pendent aguesta setmana s’a iniciat era campanha de vacunacion contra era COVID-19 entara gent grana (màger de 80 ans), damb un naut grad de dependéncia e que son adscrits ath programa d’Atencion Domiciliària der Espitau Val d’Aran.
Entad aguesta campanha dera prumèra dòsi dera vacuna Pfizer-BioNTech, eth lòc escuelhut entà realizar era vacunacion ei eth Centre de Joenessa “Antara”, qu’er Ajuntament de Vielha e Mijaran a cedit a Aran Salut e ath Conselh Generau d’Aran, pr’amor qu’ei un espaci que complís damb totes es mesures de seguretat e igiene vigentes.
“Antara” ja siguec eth passat mes de deseme eth centre a on s’amièc a tèrme eth cribatge massiu volontari entà tota era poblacion dera Val d’Aran assimptomatica que volguèc realizar-se era pròva d’antigens.
Des der inici dera pandémia en març de 2020, er Ajuntament de Vielha e Mijaran a mostrat ua clara volontat en ajudar e collaborar damb es autoritats sanitàries ena luta contra aguesta malautia. Des d’alavetz, an metut ara sua disposicion es diuèrs equipaments municipaus (Centre de Joenessa “Antara”, Palai d’Espòrts e Centre Polivalent) entà que les poguen emplegar en tot çò qu’agen de besonh.
25/02/2021