Notícies Veir istoric
Eth pròplèu 5 d’abriu se daurís eth periòde de preinscripcions ena Escòla Mairau “Era Cunhèra” de Vielha e Mijaran entath cors escolar 2021/22
Enquiath 28 de mai, es pairs/mairs interessadi/es en apuntar as sòns/sues hilhs/es auràn de presentar era sollicitud en registre der Ajuntament de Vielha e Mijaran
Era Escòla Mairau “Era Cunhèra” de Vielha e Mijaran daurís eth pròplèu 5 d’abriu eth periòde de preinscripcions entara educacion preinfantila de cara ath cors escolar 2021/22.
A compdar d’aguest dia, enquiath 28 de mai, es pairs/mairs interessadi/es en apuntar as sòns/sues hilhs/es a d’aguest cors escolar, poderàn he’c, en tot presentar es sollicituds en registre der Ajuntament de Vielha e Mijaran presenciaument o a trauès dera sedença electronica. Es documents son: sollicitud, fotocòpia deth libre de familha, fotocòpia deth DNI des pairs/mairs, certificat de conviuença deth menor e fotocòpia deth contracte de trabalh des pairs/mairs.
Entath cors escolar 2021/22, era Escòla Mairau aufrís un totau de 8 places entà P0 (de 6 mesi a 1 an), disponibles ena sua totalitat entà naues matricules. En P1 (1-2 ans) aufrís 26 places, se ben 8 ja son reservades as alumnes qu’ara madeish corsen P0. Per tant, i an 18 places dubèrtes entath pròplèu cors. E, entà P2 (2-3 ans), i auràn 34 places en totau, mès 26 son reservades as alumnes de P1 d’enguan. Açò dèishe un totau de 8 places entà naues matricules en P2.
Un viatge finalizat eth periòde de preinscripcions, eth 7 de junh se publicarà un listat provisionau damb era puntuacion provisionau. Alavetz i aurà tres dies entà possibles reclamacions, deth 8 ar 10 de junh.
Eth 14 de junh, s’ei de besonh, i aurà ua tòia en cas d’empat entre alumnes ena puntuacion, ena Sala de Plens der Ajuntament de Vielha e Mijaran. Era publicacion dera lista de sollicituds damb era puntuacion definitiva des alumnes admetudi e era lista de demora serà efectiva eth 18 de junh.
Fin finau, deth 21 ath 30 de junh se daurirà eth periòde de matriculacion, a on s’aurà de portar: fotocòpia de vacunes deth menor, certificat medic, fotocòpia dera targeta sanitària deth mainatge o dera mainada, numerò de compde bancari e fotografies (ua de tamanh 10x10 e 8 de tamanh carnet) e autorizacion dera utilizacion dera imatge deth mainatge o dera mainada.
Sollicitud: https://drive.google.com/file/d/11Y6S7rFntJhMTilJtL4IM717ADDJQJI5/view
17/03/2021