Notícies Veir istoric
Er Ajuntament de Vielha e Mijaran se desmarque dera peticion a foment sus era N-230
Per non auer estat convidat en debat
Eth baile de Vielha e Mijaran, Alex Moga, se desmarque dera peticion ath Ministèri de Foment per part deth lobby municipau que deluns passat 15 de seteme s’amassèc en Les entà tractar eth problèma dera N-230. Eth baile deth cap-lòc dera Val d’Aran remèrque que non l’an convidat ara reünion ne tanpòc a pogut participar en debat.
Er excès de circulacion de transpòrt pesat ena N-230, ath sòn pas pes comarques dera Ribagorça e era Val d’Aran ei un problèma que pòrte ans sus era taula. Era implicacion der Ajuntament de Vielha e Mijaran, atau coma deth Conselh Generau d’Aran, inicièc en 2002, quan se prepausèc ua via segregada que permetesse eth pas alternatiu ath transpòrt pesat dehòra des pòbles.
Eth 2011, s’artenhec un acòrd entà agranir era cauçada dera carretèra dera boca nòrd deth tunèl de Vielha, damb er objectiu de garantir era seguretat des persones e melhorar es possibilitats deth país aranés de cara ath torisme. Ath delà, s’a restringit eth pas de camions dissabtes pera tarde e dimenges d’iuèrn entà evitar qu’era gent se tròbe damb transpòrt pesat ath tornar as sues cases.
En paraules deth baile de Vielha e Mijaran, “avaloram que d’auti ajuntaments se somen ad aguesta demanda, mès mos planhem que non mos agen convidat ara reünion”. Moga a ahijut que “lamentam que non agen convidat ath Conselh Generau d’Aran, ne ara Deputacion de Lhèida, ne ath Parlament”.
“Parlaram damb es representants de CiU en Senat entà sollicitar ua cita damb era sosdelegada deth govèrn entà trobar ua solucion definitiva ara N-230”, apuntèc Moga, que finalizèc: “Seram encantadi de tornar a participar en aguestes reünions quan i age ua pluralitat politica logica que participe en debat”.
Era reünion deth passat deluns ei era tresau que se realize sus era problematica N-230. Era prumèra se realizèc damb ajuntaments d’Aran e Ribagorça en Pònt de Suert, a on er Ajuntament de Vielha e Mijaran e eth Conselh Generau d’Aran sigueren convidadi e i assistiren. Mès ena dusau, amiada a tèrme a Sopeira, e en aguesta tresau, ambdues entitats non an estat convidades.
Per aguesti motius, er Ajuntament de Vielha e Mijaran se desmarque dera peticion a Foment des ajuntaments de Lhèida e Òsca que deluns passat se dèren cita en Les, a on demanen ath ministèri que vage ara Comission Europèa entà sollicitar finançament comunitari entà reformar era N-230.
16/09/2014