Notícies Veir istoric
Vielha Val d’Aran artenh eth reconeishement deth Tour de França peth trabalh ena promocion dera practica deth ciclisme, en tot èster premiada damb dues “vélos” laguens deth nau sagèth “Ville à Vélo du Tour de France”
Vielha, que siguec punt de gessuda dera 9au etapa deth Tour de França de 2016, se trape laguens des 80 localitats candidates de diuèrsi paisi qu’an acuelhut bèth viatge ath Tour e qu’an optat a d’aguesta distincion
Era candidatura Vielha (Val d’Aran) a estat premiada damb dues “vélos” (biciclètes) laguens deth sagèth “Ville à Velo du Tour de France 2021”. Un nau distintiu, creat enguan pera organizacion deth Tour, entà reconéisher eth trabalh realizat pes desparières localitats qu’an acuelhut bèth viatge ua etapa d’aguesta pròva ciclista. En cas de Vielha, damb era organizacion per part der Ajuntament de Vielha e Mijaran e deth Conselh Generau d’Aran.
Un totau de 80 localitats de França, Espanha, Belgica, Irlanda, e des Païsi Baishi, que presentèren era sua candidatura, an estat reconeishudes damb aguest sagèth pera sua implicacion ena promocion dera practica deth ciclisme en sòn territòri. Eth minim de “vélos” que se podie obtier ère ua e eth maxim quate.
En dossier de presentacion dera candidatura, s’a remercat que Vielha (Val d’Aran) acuelhèc en 2016 era gessuda dera 9au etapa deth Tour de França qu’acabèc en Andòrra-Arcalis. Un eveniment qu’artenhèc amassar a 25.000 persones ena gessuda, en tot supausar un impacte economic d’1,6 milions d’èuros. Se multipliquèc per 12 eth còst dera inversion hèta peth Conselh Generau d’Aran entà acuélher aguesta etapa. Era aucupacion hotelèra pendent es dies prealables e posteriors siguec ath torn d’un 95%.
Atau madeish, s’a reconeishut er esperit deth territòri entà favorir era practica deth ciclisme. En aguest sens, actuaument se desvolòpe eth projècte TransGarona, impulsat peth Conselh Generau d’Aran e eth Conseil Départemental de la Haute-Garonne a trauès d’un programa Interreg POCTEFA. Ei un projècte transfronterèr que traçarà un camin ciclable que connectarà era Val d’Aran damb eth centre-sud de França, que facilitarà era mobilitat sostenible, er espòrt saludable e era activacion territoriau per miei dera valorizacion deth pròpri territòri, ath temps que se cree un nau producte toristic. Eth totau deth recorrut serà d’aprupètz 200 kms, entre Tolosa e era Val d’Aran. Era inversion en aguest projècte per part deth Conselh Generau d’Aran ascendirà ath torn de 1,6 milions d’euròs, e eth Conseil Départemental de la Haute-Garonne invertirà 2,43 milions. Aguesta inversion vierà finançada ath 65% per part d’un hons FEDER.
Laguens dera candidatura tanben s’a destacat era redaccion d’un plan entà limitar er emplec des veïculs entà poder accedir as itineraris en biciclèta, e era preparacion de punts de recarga de bateries entà biciclètes electriques.
“Ei ua grana satisfaccion auer podut recéber aguesta distincion per part deth Tour de França, en tot reconéisher er esfòrç que realizam en favor dera promocion der emplec des biciclètes coma espòrt e coma miei de transpòrt”, comente eth baile de Vielha e Mijaran, Juan Antonio Serrano. E ahig que “auem un municipi damb fòrça camins e recorreguts que se pòden hèr en biciclèta, e aguest tipe de reconeishements mos encoratge a seguir en aguesta linha de trabalh per un estil de vida saludable e en favor d’ua destinacion que prebotge eth torisme sostenible”.
En aguest sens, eth conselhèr d’Economia, Torisme e Promocion Economica deth Conselh Generau d’Aran, Josep Canut, a volut destacar “er impacte positiu qu’a aguest distintiu entara Val d’Aran, coma destinacion qu’apòste per espòrt e, mès concretament peth ciclisme" e higie que: “esdevier Ville à Vélo deth Tour de França e d’autes accions coma era creacion deth camin ciclable TransGarona contribuirà a facilitar ues politiques territoriaus de mobilitat sostenibla, espòrt, salut e activacion territoriau per miei dera valorizacion deth pròpri terrtòri”.
07/05/2021