Notícies Veir istoric
Er Ajuntament de Vielha e Mijaran impulse era campanha “Hè un pensament” amassa damb eth Conselh Generau d’Aran entà remassar residus pendent es gessudes esportives
Era iniciativa s’amie a tèrme deth 17 ath 23 de mai, ena que tanben i participen es associacions Aran pera Natura e Nomad Reels, damb motiu deth Dia Internacionau deth Reciclatge, entà mantier es montanhes dera Val d’Aran netes e suenhades
Ath long d’aguesta setmana, deth 17 ath 23 de mai, se trape en marcha era campanha “Hè un Pensament” organizada per Ajuntament de Vielha e Mijaran amassa damb eth Conselh Generau d’Aran, a on tanben i participen es associacions Aran pera Natura e Normad Reels.
Aguesta iniciativa, que s’amie a tèrme entà commemorar eth Dia Internacionau deth Reciclatge, preten fomentar era neteja e eth suenh des montanhes dera Val d’Aran, en tot remassar residus pendent es gessudes esportives.
Enguan, a conseqüéncia dera COVID-19 non se poirà celebrar cap tipe d’acte multitudinari, mès se convide ara gent a participar de manèra individuau o en grups de maxim 6 persones, en tot respectar es normes de seguretat vigentes. Es interessadi pòden inscriuer-se ena adreça electronica: residus@aran.org o en telefòn 973641801.
D’aute biais, s’a dubèrt un rèpte entà remassar 2000 residus ena app globau de neteja Litterati. Es interessadi/es sonque an d’installar era app, híger eth còdi 780132 e hèr fotos des residus remassadi entà arténher eth resultat.
Dissabte 22 de mai, entàs 19 ores, era Sala Era Audiovisuau de Vielha acuelherà era projeccion deth documentau Everest Green damb era intervencion deth sòn director. Aguest documentau mòstre es devastadores efèctes mieiambientaus qu’a auut era activitat umana en Everest.
A toti/es es participaires inscrits/es se les autrejarà un petit detalh que poiràn remassar enes parades plaçades enes cubèrts des Ajuntaments de Vielha e de Les, ena Oficina de Torisme de Salardú, dimenge 23 de mai des 10 as 14 ores.
“Des der Ajuntament de Vielha e Mijaran participam en aguest eveniment, pr’amor que mos cau préner consciéncia dera importància de fomentar eth reciclatge. Un des grans valors qu’auem ei, precisament, era natura, e auem de dar exemple, en tot mantier-la neta e suenhada”, comente eth baile de Vielha e Mijaran, Juan Antonio Serrano.