Notícies Veir istoric
Deth 7 ar 11 de junh se celèbre eth Kids & Drone Project, eth prumèr talhèr educatiu aeronautic dera Val d’Aran, dirigit as escolans d’ESO der Institut d’Aran
Er Ajuntament de Vielha e Mijaran, eth Conselh Generau d’Aran e Pirineos Drone Aviation impulsen aguesta iniciativa entà apropar ara joenessa as naues tecnologies, e coma ua possibla gessuda professionau
Deth 7 ar 11 de junh se celèbre eth Kids & Drone Project, eth prumèr talhèr educatiu aeronautic dera Val d’Aran, dirigit as escolans d’ESO der Institut d’Aran. Pendent aguesti 4 dies, s’impartiràn batiegi damb drones as grops repartidi segontes es bombolhes establides en airau escolar.
Aguesta iniciativa ei impulsada per Ajuntament de Vielha e Mijaran, eth Conselh Generau d’Aran e Pirineos Drone Aviation damb er objectiu d’apropar ara joenessa as naues tecnologies e apréner eth sòn emplec coma airina educativa e possible futur professionau.
Es participaires apreneràn aspèctes basics entara metuda a punt, pilotatje, mesures de seguretat e mantenement deth drone. S’emplegaràn drones TELLO, damb instructors de Pirineos Drone Aviation, en tot aufrir ensenhament individualizat, damb grops redusidi. En tot moment, pendent er aprenentatge se mantieràn es mesures de seguretat e igiene en vigor pera pandémia dera COVID-19.
Era activitat ei totaument de franc, limitada a 240 inscripcions, e aurà lòc es dies 7, 8, 9 10 e 11 de junh, des 15 as 19 ores en Centre Polivalent de Vielha. Eth periòde d’inscripcions ei dubèrt enquiath pròplèu 2 de junh.
“Aguest prumèr talhèr de drones ei ua grana escasença entara nòsta joenessa entà iniciar-se en emplec d’aguesta naua tecnologia, que damb es ans, pòt acabar derivant en ua possibla gessuda professionau”, comente eth còsso de joenessa de Vielha e Mijaran, Alberto López. E ahig que “entara joenessa ei important poder repréner ua cèrta normalitat damb naues activitats. Eth Centre de Joenessa se trape barrat en çò que tanh ath sòn foncionament ordinari des der inici dera pandémia, e actuaument acuelh es diuèrsi plans de vacunacion entà tota era gent dera Val d’Aran. Demoram qu’en un temps non guaire long, pogam tornar a aufrir es servicis abituaus entàs joeni, prealables ara aparicion dera COVID-19”.
29/05/2021