Pendent
era jornada d’ager dissabte, Vielha acuelhec eth pas dera Rider 1000,
un eveniment mototoristic non competitiu organizat peth Moto Club
Manresa, damb un circuit totau de 1000 kms ath torn de Catalonha,
damb gessuda e arribada ena ciutat de Manresa en un solet dia.
Mès
de 600 motoristes participèren en aguest eveniment, que compdèc
damb un punt de contròl ena Avenguda Deth Solan (en parcatge ath
cant der Institut d’Aran), a on es participaires sagèren eth sòn
pas e seguien era rota.
Era
melhora considerabla que i a agut a nivèu globau en relacion ara
pandémia dera COVID-19, sustot des dera distribucion des vacunes,
facilite que ja se pogue començar a celebrar eveniments de tot tipe,
a despièch de qu’encara s’an de respectar e complir es normes de
seguretat e igiene establides pes autoritats sanitàries.
Aguest
ei eth tresau viatge qu’era Rider 1000 visite e trauèsse Vielha e
Mijaran, en tot supausar ua grana escasença entà promocionar
toristicament eth municipi, e assolidar eth mototorisme en territòri,
pr’amor que cada an s’amien a tèrme d’auti eveniments, coma ei eth
cas dera Rodibook, que tanben atrè era preséncia de centenats de
participaires.
“Eth
hèt d’auer podut recéber era preséncia dera Rider 1000 en Vielha e
Mijaran, en tot èster un eveniment qu’amasse a tanta gent, confirme
qu’era situacion sanitària a melhorat fòrça, e que pòc a pòc
tornam a ua cèrta normalitat”,
comente eth baile de Vielha e Mijaran, Juan Antonio Serrano. E ahig
que “supause
ua grana promocion toristica entath municipi, e demoram qu’ath long
d’aguest ostiu, se poguen celebrar era rèsta d’eveniments previsti,
que beneficiarà a tot eth sector toristic”.