Notícies Veir istoric
Era Casa deth Senhor d’Arròs, declarada Ben Culturau d’Interés Locau per Ajuntament de Vielha e Mijaran
Aguesta bastissa, qu’en 2020 celebrèc eth sòn bicentenari, ei era sedença der Archiu Generau d’Aran e des plens deth Conselh Generau d’Aran
Era Casa deth Senhor d’Arròs, sedença der Archiu Generau d’Aran e des plens deth Conselh Generau d’Aran a estat declarada Ben Culturau d’Interés Locau per Ajuntament de Vielha e Mijaran.
En plen ordinari deth consistòri deth passat 26 de mai, es grups municipaus aprovèren per unanimitat aguesta prepausa a demana deth departament de patrimòni deth Conselh Generau d’Aran e damb eth supòrt dera EMD d’Arròs e Vila, entà qu’aguesta bastissa age aguest important reconeishement.
Aguesta distincion ei ua categoria de proteccion deth patrimòni culturau en Catalonha que s’autrege a un ben, autant mòble coma immòble. Era Casa deth Senhor d’Arròs ei ua bastissa damb un gran valor arquitectonic, pr’amor qu’ei bastida damb elements tipics deth neoclassic francés, unica ena Val d’Aran. En 2020 celebrèc eth sòn bicentenari. Ath delà, ei a on se sauve Era Querimònia, era carta magna aranesa datada de 1313.
“Des der Ajuntament auem balhat supòrt e aprovat aguesta distincion coma Ben Culturau d’Interés Locau dera Casa deth Senhor d’Arròs, pr’amor que credem qu’ei ua bastissa damb un gran valor istoric, autant a nivèu arquitectonic coma politic”, comente eth baile de Vielha e Mijaran, Juan Antonio Serrano. E ahig que “damb aguesta declaracion, se poderàn realizar futures intervencions entà protegir e conservar toti es elements e era estructura, en tot èster un patrimòni clau entara Entitat Municipau Descentralizada d’Arròs e Vila”.
31/05/2021