Notícies Veir istoric
Eth Palai de Gèu de Vielha organize un Casau Esportiu deth 5 de junhsèga ath 29 d’agost entara mainadèra de 4 a 12 ans
A conseqüéncia des òbres que se realizen entà apariar era estructura, enguan non se pòden realizar es jornades de tecnificacion de patinatge sus gèu e, per açò, s’a organizat un servici esportiu alternatiu
Aguest ostiu, des deth Palai de Gèu, coma conseqüéncia des òbres que se haràn entà reparar era estructura der edifici, non se poderàn aufrir es tradicionaus jornades de tecnificacion de patinatge sus gèu ne es corsi de natacion abituaus. Per aguest motiu, s’a organizat un servici esportiu diferent. Deth 5 de junhsèga ath 29 d’agost s’a premanit un Casau Esportiu entara mainadèra des 4 as 12 ans.
Entà d’aguest Casau Esportiu, es familhes damb ingrèssi mès baishi poderàn demanar era subvencion der Ajuntament de Vielha e Mijaran dirigida as familhes qu’agen menors que realizen casaus d’ostiu en municipi.
Aguest Casau Esportiu compdarà damb 3 blòcs d’activitats, a on eth Palai d’Espòrts serà eth punt d’inici: activitats esportives, entre es que destaquen era iniciacion ath senderisme e ara biciclèta de montanha. S’impartiràn classes d’activitats dirigides adaptades a cada grop d’edat e se practicaràn es espòrts collectius e individuaus mès populars entre era mainadèra. Tanben i aurà activitats aquatiques, que se realizaràn pendent es darrères ores deth maitin, entà profitar es ores deth dia damb mès calor. Auràn un caractèr ludic, mès tanben s’ensenharà era tecnica d’estils e, en cas de climatologia advèrsa, se desvoloparàn abilitats motores basiques. E, fin finau, tanben i aurà talhèrs esportius. Se priorizarà era practica de jòcs tradicionaus e eth desvolopament de talhèrs, coma pòt èster apréner a cambiar ua ròda dera biciclèta, interpretar mapes, conéisher es perilhs dera montanha, eca.
Un aute des aspèctes importanti, ei que cada dia entàs 10 ores s’amiarà a tèrme er esdejoar, que cadun/a aurà de portar de casa. Es dies de bon temps se gesserà dehòra, mès en tot moment anaràn acompanhadi d’un monitor.
Atau madeish, en tot trapar-mos en epòca de pandémia, eth Casau Esportiu seguirà es criteris dera Direcció General de la Joventut aplicables as activitats d’educacion en léser en periòde de vacances escolares.
Es prètzi deth casau son es següenti: 1 setmana, 56€, 2 setmanes, 86,10€, e, 4 setmanes, 123€.
Era mainadèra aurà de portar eth següent materiau: morralet, casqueta, cantimplora, biciclèta, casc, banhador, tovalhòla, ròba esportiva e esdejoar.
Entà mès informacion, vos podetz informar en telefòn 973642864.
01/06/2021