Notícies Veir istoric
Era Pedals de Foc Non Stop celèbre era sua 15au edicion aguest dissabte 26 de junh
Era pròva ciclista de BTT damb gessuda e arribada en Vielha, compdarà damb lèu 1000 participaires, e supausarà ua repercusion economica entà Vielha e Mijaran ath torn des 300.000€
Aguest pròplèu dissabte 26 de junh, era pròva ciclista de BTT, Pedals de Foc Non Stop, celebrarà era sua 15au edicion, damb eth tradicionau recorregut qu’a Vielha coma punt de gessuda e d’arribada. Aguesta competicion, ath delà, manten era distincion de Campionat d’Euròpa Ultra Marathon MTB.
Dempús dera aparicion dera pandémia dera COVID-19, era edicion de 2020 s’auec d’anullar, e de cara a enguan, se manten eth perfil abituau de 213 kms e 6200 mètres de desnivèu positiu, en tot crotzar bona part dera Val d’Aran e es comarques vesies (Alta Ribagorça, Pallars Sobirà e Pallars Jussà). En tot moment, des dera organizacion se seguiràn es mesures de prevencion establides en protocòu entà pròves de BTT.
Aguesta competicion ei ja un classic enes eveniments esportius der ostiu en Vielha e Mijaran. Era prumèra edicion se disputèc en 2006, e cada an a aumentat era donada de participaires. Sonque calèc lamentar era non celebracion est an passat, a conseqüéncia dera pandémia.
Ei ua des pròves que mès repercusion economica compòrte entath sector toristic de Vielha e Mijaran, pr’amor que se demore lèu 3000 persones pendent tota era dimenjada, en tot compdar as participaires e acompanhants. Era bona situacion respècte ara pandémia, gràcies as campanhes de vacunacion, permet qu’ena edicion d’enguan, i pogue auer ua nauta afluéncia de gent en municipi pendent era sua celebracion.
Eth programa dera competicion ei eth següent: Diuendres 25 de junh, des 16 as 21 ores s’amiarà a tèrme era arremassada de dorsaus en parcatge des antigues casèrnes militares. Eth briefing non serà presenciau, senon que s’enviarà un vidèo as participaires. Dissabte, entàs 04:30, aurà lòc era gessuda en Carrèr Querimònia, e pera tarde se realizarà eth liurament de prèmis a mesura que se complèten es pòdis des desparières categories.
“Èm contenti de poder tornar a recéber era Pedals de Foc Non Stop en nòste municipi, dempús dera arturada forçada pera pandémia en 2020. Ei ua des granes competicions esportives qu’auem en Vielha e Mijaran, e que supausen ua grana repercusion economica entà tot eth sector toristic locau”, comente eth baile de Vielha e Mijaran, Juan Antonio Serrano. E ahig que “damb era participacion de corredors de diuèrsi païsi, era Pedals de Foc Non Stop met a Vielha e Mijaran en mapa internacionau des competicions esportives e mèrque er inici des pròves que s’an de celebrar en nòste municipi ath long d’aguest ostiu”.