Notícies Veir istoric
Vielha e Mijaran implantarà energia geotermica en diuèrsi equipaments en ua accion conjunta damb eth Conselh Generau d’Aran e er Institut Cartogràfic i Geologic de Catalunya
En Palai de Gèu s’aplicarà aguesta energia renovabla que permeterà balhar calor ena climatizacion dera bastissa e en aigua des piscines, e heired ena pista de gèu
Vielha e Mijaran disposarà d’energia geotermica en diuèrsi equipaments enes pròplèu ans, en tot supausar era aplicacion d’ua energia renovabla, neta e autoctòna, que permeterà disminuir er emplec e dependéncia des energies fossils e contribuir atau ara eliminacion dera peada de carbòni.
Aguesta accion partís d’un convèni entre er Ajuntament de Vielha e Mijaran damb eth Conselh Generau d’Aran e er Institut Cartogràfic i Geologic de Catalunya entà fomentar er emplec dera geotermia a trauès deth projècte de climatizacion urbana de heired e calor “Vielha Smart Multi-RES micro DHC grid”, que darà cobertura a diuèrsi equipaments e bastisses de Vielha per miei d’ua ibridacion d’energia geotermica.
Eth Palai de Gèu serà un des equipaments que se beneficiarà dera aplicacion dera geotermia, en tot balhar calor ena climatizacion dera bastissa e en aigua des piscines, e heired ena pista de gèu, en tot generar un estauvi energetic e economic important.
Atau madeish, eth Palai d’Espòrts serà un aute des emplaçaments a on tanben s’aplicarà aguesta energia geotermica, qu’ajudarà a arténher un modèu energetic mès sostenible, basat ena eficiéncia energetica, er impuls der autoconsum, era reduccion des emissions de CO2 e era luta contra eth cambi climatic.
“Des der Ajuntament apostam fermament pera aplicacion dera geotermia, pr’amor qu’èm conscienti que cau apostar mès pes energies renovables entà arténher un modèu mès sostenible e, qu’ath delà, permeterà redusir es despenes de mantenement enes bastisses a on sigue implantada, e dera quau s’en beneficiarà autant eth sector public coma privat”, comente eth baile de Vielha e Mijaran, Juan Antonio Serrano.
01/07/2021