Notícies Veir istoric
Vielha e Mijaran acuelh aguest dissabte era 2au etapa dera corsa de BTT Hard Bike
Es 250 participaires gesseràn e acabaràn en Plan Batalhèr en un circuit circular de 48 kms e 2100 mètres de desnivèu, en tot recórrer bona part deth paisatge naturau deth municipi
Aguest dissabte, 3 de junhsèga, Vielha e Mijaran serà scenari dera 2au etapa dera 2au edicion dera pròva de BTT Hard Bike qu’a lòc der 1 ath 3 de junhsèga en diuèrsi endrets dera Val d’Aran.
Era etapa de Vielha e Mijaran gesserà e acabarà en Plan Batalhèr, en tant qu’era organizacion a premanit etapes circulares, coma principau nauetat en relacion ara anteriora edicion. En aguest sens, es 250 participaires realizaràn un totau de 48 kms e 2100 mètres de desnivèu, en tot recórrer bona part deth paisatge naturau deth municipi: Pònt d’Arròs, Arròs, Aubèrt, era Val de Salient, Gausac e eth Plan Batalhèr entre d’auti emplaçaments.
Entàs 08:30 se liurarà era bossa as corredors, entàs 09:20 s’amiarà a tèrme era dubertura dera caisha de gessuda e entàs 09:30 se realizarà era gessuda oficiau d’aguesta 2au etapa dera Hard Bike.
En totau, 3 etapes que permet visitar cada dia ua part dera Val d’Aran, en tot gaudir deth territòri naturau. Est an passat non se podec celebrar era pròva a conseqüéncia dera COVID-19.
“Era Hard Bike supause ua grana escadença entà qu’es participaires poguen gaudir de bona part des montanhes e camins qu’auem en Vielha e Mijaran”, comente eth còsso d’espòrts, Alberto López. E ahig que “gràcies ara melhora dera situacion en relacion ara pandémia, seguim en tot acuélher mès eveniments esportius en territòri, que s’alongaràn pendent tot er ostiu”.