Notícies Veir istoric
Dus alumnes dera FP Duau de Gestion Administrativa der Institut d’Aran se trapen en tot hèr estades formatives becades en Ajuntament de Vielha e Mijaran
Aguesta accion ei frut d’un convèni entre eth consistòri e eth centre educatiu entà auer estudiants damb beques remonerades, coma prumèr contacte damb eth mon laborau
Dus alumnes qu’estudien era FP Duau deth Cicle Formatiu de Grad Mejan de Gestion Administrativa en Institut d’Aran se trapen en tot hèr estades formatives becades en Ajuntament de Vielha e Mijaran.
Concretament, es alumnes s’an incorporat ara Oficina Tecnica damb beques remonerades, a on realizen prètzhèts d’introduccion de donades administratives e documentacion, atau coma atencion ath public. En totau, son 1000 ores formatives qu’an començat en mes de junh e s’alongarà enquiath pròplèu mes de mai de 2022.
Aguesta iniciativa nèish d’un convèni entre er Ajuntament de Vielha e Mijaran e er Institut d’Aran, entà qu’er alumnat pogue combinar er aprendissatge en centre educatiu, ath madeish viatge qu’an eth prumèr contacte damb eth mon laborau, en aguest cas en consistòri.
“Des der Ajuntament iniciam aguest convèni damb er Institut d’Aran entà qu’aguesti/es joeni/es poguen veir es possibilitats laboraus que les pòt aufrir ua administracion publica, en tot supausar era sua prumèra immersion en mon professionau", comente eth dusau tinent d’alcalde e còsso d’ensenhament de Vielha e Mijaran, Alberto López. E ahig que “des deth consistòri portam fòrça ans en tot collaborar damb er Institut d’Aran en diuèrsi acòrds entà qu’es joeni agen contacte damb eth mon laborau e, en cas dera FP Duau, demoram que sigue ua activitat a long tèrme”.