Notícies Veir istoric
Er Ajuntament de Vielha e Mijaran suspenerà era modificacion des taxes previstes entar exercici 2022
Analisada era actuau situacion dempús deth debat suscitat, er Ajuntament a decidit suspéner era pujada des taxes municipaus prevista entath pròplèu an e cercarà d’autes solucions entà afrontar er equilibri fiscau, sense aumentar es ingrèssi
Er
equip de govèrn der Ajuntament de Vielha e Mijaran a acordat
suspéner era modificacion provisionau des taxes presentades era
darrèra setmana, que pretenie dotar d’equilibri fiscau en pressupòst
municipau de 2022 e corbir eth deficit que genèren es servicis
essenciaus que se presten en municipi.
“Hè mès de 30 ans que non s’a abordat era problematica que genère era manca d’ingrèssi en relacion ath creishement e era aumentacion de servicis municipaus que se presten ara ciutadania, atau coma era adaptacion e melhora d’infrastructures basiques coma eth provediment e canalizacion dera aigua entre d’auti, ei per açò que sometérem aguesta pujada de taxes”, manifestaue eth baile de Vielha e Mijaran, Juan Antonio Serrano.
Actuaument, s’an realizat granes inversions en subministrament d’aigües mès contunhe pendent actuar en 30% deth hilat municipau entà actualizar-lo, ath delà d’intervier en 11 des 14 depòsits d’aigua existents qu’an mès de 50 ans e presenten damatges estructuraus, pr’amor que non an arrecebut cap inversion des deth sòn bastiment.
Entar
equip de govèrn municipau ei de besonh ua planificacion a long
termini que garantisque un creishement equitatiu de tot eth municipi
damb melhores des sòns servicis e un ampliament des madeishi e que
permete corbir es besonhs que se poguen generar ena ciutadania.
“Dempús de mantier convèrses damb desparièrs sectors dera poblacion, consideram qu’ei de besonh suspéner era modificacion provisionau qu’auíem prevista entath 2022 deuant es dificultats que se viuen generades pera pandemia dera COVID-19”, comente Serrano. E ahig que “serà de besonh cercar ua solucion responsabla que garantisque prosperitat a tot eth municipi e permete un creishement equivalent as besonhs des ciutadans”.
03/08/2021