Notícies Veir istoric
Eth pròplèu 4 de seteme, Vielha e Mijaran acuelh era jornada esportiva “Aran Per Espòrt”
Aguest nau eveniment organizat per Èm Aran Sports Foundation compdarà damb Corses e Caminades Populares de 7,5 e 15 km, ua Cronoescalada de 8,6 km e ua Olimpiada Infantila
Eth pròplèu 4 de seteme, Vielha e Mijaran serà scenari dera celebracion dera prumèra edicion dera jornada esportiva “Aran Per Espòrt”, organizat per Èm Aran Sports Foundation, e que compdarà damb era collaboracion der Ajuntament de Vielha e Mijaran.
Aguest eveniment compdarà damb desparières pròves de diuèrses disciplines esportives: I aurà ua corsa e ua caminada populara de 7,5 km, damb un desnivèu positiu de 280 mètres, damb recorregut Vielha-Escunhau-Vielha. Tanben i aurà ua corsa e ua caminada populara de 15 km, damb un desnivèu positiu de 850 mètres, damb recorregut Vielha-Tuca-Vielha. D’aute biais se celebrarà ua cronoescalada en biciclèta de 8,6 km, damb un desnivèu positiu de 620 mètres damb gessuda en Vielha e arribada ena Bassa d’Oles. E, era mainadèra, poderà gaudir d’ua Olimpiada damb jòcs esportius.
Eth prètz unic dera inscripcion ei de 20€, e eth tèrme d’inscripcion serà dubèrt enquiath pròplèu 31 d’agost. Entà formalizar era inscripcion podetz accedir ara plana web: www.emaransportsfoundation.org o presenciaument: Dissabte 28 d’agost en Bossòst (ath cant dera Oficina de Torisme), en orari des 17:30 as 19:00. En Vielha, eth 31 d’agost, en Passeig dera Libertat, en orari des 19:00 as 20:30. Ath delà, eth 3 de seteme, enes cubèrts der Ajuntament de Vielha e Mijaran se poiràn recuélher es dorsaus e es inscripcions dera Olimpiada Infantila, en orari des 17:00 as 20:00. Era samarreta der eveniment ei includida laguens deth Welcome Pack.
Toti es sòs requectadi ena jornada anaràn destinadi a finançar bèques e ajudes as esportistes aranesi. Èm Aran Sports Foundation ei ua entitat sense anim de lucre.