Notícies Veir istoric
ADDA e er Ajuntament de Vielha e Mijaran presenten un medalhon entara gent grana
Era Associació Discapacitats d’Aran (ADDA) e er Ajuntament de Vielha e Mijaran presentèren deluns prumèr de seteme, ena sala d’actes deth consistòri es medalhons hèti a man pes membres dera entitat damb era forma der escut der ajuntament aranés, que se repartiràn en dinar dera gent grana des hèstes deth municipi.
Dempús dera reüsida Mair de Diu de Vielha que se realizèc er an passat, es membres d’ADDA an elaborat un medalhon d’hanga artesanau damb era forma der escut der Ajuntament de Vielha e Mijaran. Eth totau s’an confeccionat 200 reproduccions, fòrça que ne seràn repartides en dinar dera gent grana que se celèbre laguens des hèstes locaus, dimars que ven 9 de seteme.
Er eveniment de presentacion ena sala d’actes deth consistòri a estat presidit per Dolors Berdié, directora tecnica d’ADDA, e Alex Moga, baile de Vielha e Mijaran. En paraules as membres dera entitat, eth baile aranés a declarat que “vos dongui es gràcies pera elaboracion d’aguest exemplar entara gent grana de Vielha. Supause ua contribucion e ajuda de cara a melhorar es hèstes majors des qué n’ètz protagonistes, donques contribuïtz a hèr erosa ara gent grana e persones qu’ac passen mau”.
Eth consistòri deth cap-lòc dera Val d’Aran a participat ena elaboracion d’aguesti modèls en tot assumir eth còst deth materiau e era man d’òbra dera associacion. Fin finau, eth baile der ajuntament aranés convidèc as membres d’ADDA ath dinar popular des hèstes majors, eth dimèrcles 10 de seteme ena Plaça dera Glèisa.
01/09/2014