Notícies Veir istoric
Vielha acuelh era 10au edicion dera Rodibook es dies 3 e 4 de seteme
Coma ei abituau, aguesta pròva motociclista non competitiva aurà Vielha coma lòc de gessuda e d’arribada, ena que se demoren lèu 1000 participaires, en tot supausar ua repercusion economica entath sector toristic de mès de 300.000€
Vielha torne a èster epicentre deth mototorisme enguan, en tot acuélher es dies 3 e 4 de seteme era 10au edicion dera Rodibook, era pròva non competitiva de motociclisme que se celèbre enes Pirenèus.
Vielha ei, coma cada an, eth lòc de gessuda e arribada d’aguest eveniment, qu’enguan demore era preséncia de lèu 1000 participaires, en tot supausar ua repercusion economica entath conjunt deth sector toristic de Vielha e Mijaran, de mès de 300.000€. Ua pròva qu’a lòc pera Val d’Aran, Aragon e sud de França en tot completar mès de 700 kms.
A conseqüéncia dera pandémia dera COVID-19, era Rodibook a premanit un programa en quau se seguissen es mesures sanitàries vigentes entà evitar riscs de contagis. En aguest sens, era gessuda (que s’amiarà a tèrme en parcatge des antigues casèrnes militares) se realizarà en grups de 3 motociclistes cada 30 segons, en tot evitar aglomeracions, e era organizacion liurarà eth materiau as participaires sense baishar-se dera motociclèta e sense trèir-se eth casc. Atau madeish, eth sopar finau tanben demore suspenut.
Programa:
Diuendres 3 de seteme: Des 10 as 23 ores, en parcatge des antigues casèrnes militares se liurarà era bossa de benvenguda damb tot çò de besonh entara rota. Eth briefing se liurarà per escrit e se penjarà un vidèo ena plana web oficiau.
Dissabte 4 de seteme: A compdar des 6 ores gessuda des desparières categories dera Rodibook: Rodibook Pro, Rodibook Rookie, Rodibook Off Road Only Trail/Scramblers. Era arribada des participaires ei prevista entre es 20 e es 23 ores en madeish parcatge, a on se poderàn hèr es fotografies de rigor e se liurarà eth diplòma de participacion.
“Èm satisfèti de poder compdar un an mès damb era Rodibook en nòste municipi, que mos assolide coma destinacion qu’apòste peth mototorisme, e que supause ua repercusion economica fòrça importanta entath sector toristic entà dar per finalizat er ostiu”, comente eth baile de Vielha e Mijaran, Juan Antonio Serrano. E ahig que “en 2020 siguec er unic eveniment important que se podec realizar damb era pandémia. Era bona situacion que viuem damb es campanhes de vacunacion, somat ath compliment des mesures sanitàries, mos permet èster positius en relacion ara celebracion d’aguest tipe d’eveniments, en tot assegurar que non i age riscs de contagis”.