Notícies Veir istoric
Vielha torne a celebrar era Hèira dera Tardor aguest pròplèu 8 d’octobre
Dempús d’auer-se suspenut era edicion de 2020 pera pandémia, enguan es carrèrs de Vielha acuelheràn autant era hèira de bestiar coma era comerciau, en tot seguir es mesures sanitàries vigentes
Aguest pròplèu 8 d’octobre, Vielha tornarà a celebrar era tradicionau Hèira dera Tardor, dempús de qu’en 2020 s’auec de suspéner pera aparicion dera pandémia dera COVID-19.
D’aguesta manèra, eth cap-lòc dera Val d’Aran recupère aguesta hèira centenària, qu’amasse a fòrça gent arribada de desparièrs pòbles dera Val d’Aran, des comarques vesies e deth sud de França.
Coma ei abituau, se celebrarà autant era hèira comerciau coma era de bestiar. En çò que tanh ara prumèra, enguan se barrarà era Avenguda Pas d’Arró e Avenguda Castièro, en tot auer-i paradetes sonque en un des costats dera via, en tot favorir que i pogue auer mès espaci enes carrèrs, sense que i age aglomeracions de gent. Ena hèira de bestiar, que coma de costum a lòc en antic camp de fotbòl, se poderà gaudir dera preséncia des animaus, damb es abituaus concorsi de bestiar, mès enguan demore suspenut er esdejoar popular.
“Èm contenti de poder recuperar era hèira dera tardor, gràcies ara bona situacion que viuem en relacion ara pandémia. Ua tradicion qu’a mès de cent ans en Vielha e qu’amasse a gent de fòrça endrets dera Val d’Aran e des territòris der entorn”, comente eth baile de Vielha e Mijaran, Juan Antonio Serrano. E ahig que “en tot moment auem establit eth protocòu entà que se poguen complir es mesures sanitàries vigentes aué dia en relacion ara prevencion de contagis dera COVID-19”.
04/10/2021