Notícies Veir istoric
Vielha e Mijaran a recuperat aguest ostiu era activitat culturau e esportiua damb un totau de 54 eveniments
Gràcies ara bona situacion en relacion ara pandémia, eth municipi a reprenut era activitat culturau e esportiua, dempús d’un an arturada, en tot supausar eth melhor ostiu a nivèu toristic des darrèri 30 ans
Vielha e Mijaran a finalizat era sason d’ostiu damb un ample conjunt d’activitats a nivèu culturau e esportiu, en tot auer acuelhut un totau de 54 eveniments.
En airau esportiu, Vielha e Mijaran a tornat a plaçar-se coma epicentre deth Pirenèu damb fòrça activitat pendent tot er ostiu. En aguest sens, destaque era celebracion de pròves fòrça importantes coma era 1èra edicion dera competicion d’ultra-trail Aran by UTMB, qu’acuelhec a lèu 4000 persones en junhsèga, era 4au Trail Vielha-Molières 3010 damb lèu 500 participaires, o era 15au Pedals de Foc Non Stop de BTT qu’en junh amassèc a lèu 1000 participaires. Atau madeish, Vielha tanben a apostat peth mototorisme, damb grani eveniments coma siguec era 10au Rodibook, damb lèu 1200 participaires o era Coast to Coast Triumph de seteme, damb lèu 140 participaires damb era que finalizèc era sason d’ostiu eth passat 24 de seteme.
Era preséncia de toti aguesti eveniments esportius generèc ua repercusion economica de mès de 2 milions d’èuros en benefici deth sector toristic de Vielha e Mijaran, en tot èster eth melhor ostiu autant de Vielha coma deth conjunt dera Val d’Aran des darrèri 30 ans.
En airau culturau, i a agut eth cicle “Ostiu en Familha” damb activitats entara mainadèra toti es dissabtes des mesi de junhsèga e agost, en desparièrs emplaçaments de Vielha. Atau madeish, i a agut un totau de 19 actuacions de musica en carrèr, amiades a tèrme es dimenges tà meddia en diuèrsi carrèrs de Vielha. D’aute biais, es còlhes de dances araneses tanben an amenizat es vrespades damb un totau de 4 actuacions. E fin finau, tanben s’a podut gaudir de hèires e mercats artesanaus, coma siguec era estrea enguan deth Vielha Market, damb paradetes es dimenges ena plaça dera glèisa des membres dera Associacion d’Artesans e Artistes dera Val d’Aran.
“Èm fòrça satisfèti per auer barrat un ostiu damb tanti eveniments esportius e culturaus qu’an generat qu’age estat eth melhor des darrèri 30 ans”, comente eth baile de Vielha e Mijaran, Juan Antonio Serrano. E ahig que “era bona situacion en relacion ara pandémia mos a permetut tornar a recuperar era activitat en carrèr e enes installacions municipaus, e seguiram damb aguesta linha de trabalh pendent era tardor e er iuèrn, damb fòrça mès activitats entà tota era familha”.
06/10/2021