Notícies Veir istoric
Vielha e Mijaran sufrague eth 50% deth còst deth materiau escolar des alumnes dera Escòla Garona empadronadi en municipi
405 alumnes se’n beneficiaràn d’aguesta ajuda qu’aufrís eth consistòri, en un convèni signat damb eth centre escolar, damb eth que se destinaràn 20.000€ entà ajudar as familhes
Er Ajuntament de Vielha e Mijaran sufrague eth 50% des despenes deth materiau escolar des alumnes dera Escòla Garona de Vielha que son empadronadi en municipi, entath cors escolar 2021-22.
Eth consistòri destine ua partida de 20.000€, gràcies ath quau un totau de 405 alumnes se’n beneficiaràn d’aguesta subvencion, que se destine a ajudar as familhes en uns momenti economics fòrça complicadi, a conseqüéncia dera pandémia dera COVID-19. En totau, lèu se destinarà 50 € d’ajuda per cada alumne empadronat en municipi, d’un totau de 90€ de còst deth materiau escolar.
En 2020 eth consistòri ja destinèc ua ajuda extraordinària entà sufragar eth 50% deth còst d’aguest materiau escolar, de manèra que se refortilhe eth compromís d’ajudar economicament as familhes pendent eth nau cors escolar.
“Damb aguest convèni, des der Ajuntament de Vielha e Mijaran, seguim en tot ajudar as familhes deth municipi a paliar part des efèctes dera crisi economica derivada dera pandémia dera COVID-19”, comente eth baile de Vielha e Mijaran, Juan Antonio Serrano. E ahig que “refortilham eth nòste compromís damb es familhes d’ajudar-les en un moment economicament complicat. Est an passat ja aufrírem ua ajuda extraordinària en airau escolar, e enguan la mantiem en forma de convèni, en tot assegurar qu’es alumnes poguen dispausar deth materiau escolar de besonh”.
07/10/2021