Notícies Veir istoric
Er Ajuntament de Vielha e Mijaran receberà, per prumèr viatge, ua ajuda per part deth Conselh Generau d’Aran entath mantenement deth Palai de Gèu, damb ua partida de 100.000€
Ei eth prumèr viatge qu’era maxima institucion politica aranesa s’implique en ajudar ath consistòri damb eth foncionament dera principau installacion esportiua municipau, que balhe servici a tota era Val d’Aran
Er Ajuntament de Vielha e Mijaran receberà ua ajuda de 100.000€ per part deth Conselh Generau d’Aran entath mantenement dera installacion deth Palai de Gèu.
Aguesta ei ua hita istorica, pr’amor qu’ei eth prumèr viatge qu’era maxima institucion politica dera Val d’Aran s’implique directament en foncionament deth principau equipament esportiu municipau e dera Val d’Aran, que balhe servici ara ciutadania de Vielha e Mijaran e de tot eth territòri.
Des deth consistòri ja hè fòrça ans que se trabalhe ena implicacion des desparières administracions politiques, autant dera Val d’Aran, coma de Catalonha e der Estat. En aguest sens, er equip de govèrn s’a amassat damb representants politics d’aguestes administracions ath long des darrèri ans entà arténher era sua collaboracion.
En 2019, s’amassèc damb era antiga secretària d’estat entar espòrt e presidenta deth Consejo Superior de Deportes, Mª José Rienda, ara que se li expliquèc era situacion que viuie eth Palai de Gèu, autant a nivèu de foncionament coma eth besonh d’inversions. Tanben i auec amassades damb er antic secretari generau der espòrt dera Generalitat de Catalunya, Gerard Figueras, entà cercar eth supòrt institucionau catalan en mantenement deth Palai de Gèu.
D’aute biais, era Diputació de Lleida s’implique des de 2017 en mantenement deth Palai de Gèu, damb ua partida fixa de 100.000€. Ua implicacion gràcies as gestions amiades a tèrme per alavetz deputat dera Val d’Aran en Lhèida, Francés Boya.
Actuaument, eth Palai de Gèu de Vielha ja a realizat era prumèra fasa de remodelacion dera estructura dera installacion, en tot possibilitar era dubertura dera activitat ena planta baisha. A principis de 2022 se demore que s’agen podut acabar es trabalhs de melhora e sanejament dera estructura (dusau fasa), entà poder balhar servici des activitats dera prumèra planta (pista de gèu e piscines interiores), entà repréner, fin finau, era normalitat en sòn foncionament.
“Des der Ajuntament de Vielha e Mijaran arregraïm era implicacion deth Conselh Generau d’Aran en mantenement deth Palai de Gèu, pr’amor qu’ei un equipament que balhe activitat entà tota era Val d’Aran, e ei de besonh era collaboracion de d’autes administracions politiques deth territòri”, comente eth dusau tinent d’alcalde e còsso d’Espòrts de Vielha e Mijaran, Alberto López López. E ahig que “hè ans que persutam entà qu’es institucions politiques araneses e de dehòra collabòren en aguest equipament esportiu, pr’amor qu’ei de besonh entath sòn foncionament. Era Diputació de Lleida hè uns ans que mos ajude, hèt que lis arregraïm fòrça, mès mos cau era implicacion de d’autes administracions, e trabalham entà qu’açò sigue possible, se volem ua installacion que pogue garantir eth sòn futur”.
19/10/2021