Notícies Veir istoric
Vielha e Mijaran realize era neteja e desinfeccion de toti es depòsits d’aigua deth municipi
Aguesta accion, que consistís en uedatge e era posteriora neteja e desinfeccion per miei d’ua empresa especializada, s’amie a tèrme entà suenhar era salut des persones, pr’amor qu’es depòsits acumulen sediments damb eth pas deth temps
Er Ajuntament de Vielha e Mijaran se trape en tot realizar era neteja e desinfeccion periodica des desparièrs depòsits d’aigua que se trapen en toti es pòbles deth municipi.
Aguesta accion ei plan de besonh, pr’amor que damb eth pas deth temps es depòsits s’enlordissen, en tot acumular sediments, e cau netejar-les entà suenhar era salut des persones.
Es trebalhs, que les amie a tèrme ua empresa especializada, consistissen en uedar es depòsits entà poder cercar se i a bèth tipe d’incidéncia, e trèir toti es sediments acumuladi entara sua posterior desinfeccion entà esvitar era possibla aparicion de bacteries, e dempús era enterpresa elabòre er informe avient sus er estat deth depòsit. Aguesta intervencion pòt interferir en servici d’abastiment d’aigua enes abitatges, encara que tà garantir eth subministrament s’amien a tèrme diuèrsi bypass pendent 24 ores, entà poder aufrir eth servici damb normalitat.
Aguest tipe d’accions siguec iniciada ena anteriora legislatura, pr’amor que hège mès de quinze ans que non s’auien netejat ne desinfectat es tretze depòsits existenti, e supausaue un perilh entara salut des persones. Er objectiu ei qu’aguesta actuacion se hèsque periodicament, entà mantier un corrècte foncionament d’aguesti depòsits.
Segontes eth còsso d’Infrastructures, Òbres e Servicis de Vielha e Mijaran, Jacint Cuny, “aguesta intervencion enes depòsits d’aigua deth municipi ei de besonh, pr’amor que damb eth temps es depòsits s’enlordissen de hanga, e s’a de hèr ua neteja integrau. Era salut des nòsti vesins ei çò que mos cau preservar, e per aguest motiu amiam a tèrme es trebalhs de manteniment d’aguesti equipaments”. Ath delà, Cuny hig que “cau tier en compde qu’es depòsits an cloro, e açò favorís eth deteriorament des sues foncions abituaus. Per tant, auem d’actuar regularament entà garantir un foncionament avient. En aguest sens, demanam desencuses s’en bèth moment s’a amendrit eth servici, mès ère a causa d’aguesti trabalhs”.
20/10/2021