Notícies Veir istoric
Gran numèro de visites ena sala d’exposicions de Vielha
Era sala d’exposicions de Vielha a artenhut un totau de 3.710 visites enes tres exposicions que s’an realizat aguest 2014 enquiara data. Eth mes a on an concorrut mès assistents a estat agost damb 1.692 persones, ena mòstra itineranta ‘Cabanes Comunaus dera Val d’Aran’. Es autes dues exposicions, tanben an agut bona recepcion per part deth public.
‘Aran, Clavis Regni’ siguec era prumèra exposicion der an, que dauric es sues pòrtes deth 21 de deseme enquiath 28 de hereuèr. Eth totau, acuelhec a 470 visitants, damb fòrça regularitat, e era majoria sollicitèren era visita guidada, d’ora e mieja de durada. En linhes generaus, auec ua nauta acceptacion e era avaloracion deth guidatge siguec satisfasenta.
Era dusau, ‘Cinema en temps de guerra, exili i repressió’, siguec era mens concorruda, encara que cau apuntar que se celebrèc es mesi de baisha sason toristica, en abriu e mai. Pendent aguesti dus mesi, 281 persones gaudiren dera mòstra istorica que tanben includie ua visita guidada.
Era darrèra, ‘Cabanes Comunaus dera Val d’Aran’, installada deth 30 de junh enquiath 15 de seteme, a estat era exposicion damb mès exit. Er aument deth public a estat notable damb un totau de 2.959 visitants, 1.692 sonque en mes d’agost. Era installacion d’un panèl exterior a estat clau entà cridar era atencion des toristes. Er increment entre es aranesi se gotilh ara relacion dirècta deth tèma damb era vida ena Val d’Aran.
Fin finau, cau destacar qu’es visites guidades des tres exposicions, ena Av. Pas d’Arró numèro 7, s’an realizat er aranés, catalan, castelhan e francés.