Notícies Veir istoric
Eth Centre de Joenessa “Antara” de Vielha e Mijaran torne a daurir es sues pòrtes aguest pròplèu diuendres 29 d’octobre
Dempús d’auer-se arturat era sua activitat damb era aparicion dera COVID-19, tornarà a balhar servici ara joenessa, de 12 a 18 ans, pendent es dimenjades e es principaus hèstes enquiara fin deth cors escolar
Aguest pròplèu diuendres 29 d’octobre, eth Centre de Joenessa “Antara” de Vielha e Mijaran torne a daurir es sues pòrtes entà qu’era joenessa, de 12 a 18 ans, pogue tornar a auer un espaci fixe d’òci entà da eri pendent es dimenjades e hestius.
Eth centre siguec barrat damb era aparicion dera pandémia dera COVID-19, e des d’alavetz non a podut balhar eth sòn servici abituau as mès joeni. Mès, ara, damb ua melhora considerabla dera situacion vers ara pandémia, sustot gràcies as campanhes de vacunacion, se pòt garantir eth sòn foncionament.
Er Ajuntament de Vielha e Mijaran a establit eth orari qu’ère abituau abantes dera pandémia, de diuendres a dimenge, des 17 as 21 ores. Atau madeish, de cara as pònts hestius, e es hèstes de Nadau e Pasca, s’aufrirà ua ampliacion der orari entà qu’era joenessa pogue gaudir e emplegar pendent mès ores aguest espaci.
Ath delà, se recuperaràn es talhèrs tematics qu’aueren fòrça participacion ans endarrèr, entà qu’es usatgèrs poguen desvolopar desparières activitats especifiques sus era educacion e era cultura, entà trabalhar valors restacadi damb era educacion emocionau, era tolerància, era democràcia, eth desvolopament personau, atau coma es sues capacitats creatives e critiques.
“Des der Ajuntament de Vielha e Mijaran èm fòrça satisfèti de poder anonciar era redubertura d’aguest espaci dirigit as joeni, pr’amor que credem qu’aguest sector dera poblacion auie de besonh recuperar un lòc fixe entà da eri, a on pòden jogar e realizar fòrça activitats pendent es dimenjades e jornades hestiues, en tot socializar-se e interrelacionar-se damb d’auti joeni deth municipi”, comente eth dusau tinent d’alcalde e còsso de joenessa de Vielha e Mijaran, Alberto López. E ahig que “tornaram a dessenhar talhèrs educatius coma ère de costum, entà fomentar valors importanti entara nòsta joenessa, pr’amor que son eth futur de Vielha e Mijaran, e auem de suenhar-les e ajudar-les a créisher coma persones, damb activitats que les ajuden a reflexionar e a madurar”.
27/10/2021