Notícies Veir istoric
Comencen es òbres de neteja e recuperacion deth camin des Clòses de Gausac
Damb aguesta intervencion, era EMD de Gausac vò tornar a daurir aguest camin istoric, en tot hèr-lo accessible a pè, des deth pòble enquiara carretèra d’accès ath Plan Batalhèr, en tot completar un recorregut circular
Pendent aguesta setmana, s’an iniciat es òbres de neteja, mantenement e recuperacion deth camin des Clòses en tèrme de Gausac.
Aguesta intervencion, que compde damb un pressupòst de 8080 € subvencionat pera Diputació de Lleida damb eth Plan economic entàs ens locaus en matéria de salut, preten recuperar un camin istoric, en tot favorir qu’eth sòn trajècte, que pòrte des deth pòble enquiara carretèra d’accès ath Plan Batalhèr, pogue èster accessible a pè, autant entàs vesins coma visitaires, en tot completar un recorregut circular.
Actuaument, aguest camin se trape en desús. Era part inferiora se trape caperada pera vegetacion, mentre qu’era part superiora s’a perdut e ei complicat de poder definir eth sòn traçat originau.
Aguest camin se dividís en dus trams: eth prumèr, era part inferiora, que comence en Gausac, en tot passar peth camin deth carrèr dera Santeta e acabe ena carretèra d’accés ath Plan Batalhèr. Aciu se realize era neteja dera vegetacion damb desbrossament e adeqüacion deth camin, s’installarà un element fixe entà evitar er accès motorizat e se formarà un camin en talhús dera carretèra entà poder pujar enquiath camin. Eth dusau tram que comence en tot passar era carretèra, en tot acabar eth prumèr tram, puge enquiara corba dera carretèra d’accès ath Plan Batalhèr. Aciu se formarà un camin nau, en tot seguir era sua forma istorica. Atau madeish, en camin se bastirà un pas d’aigua entà poder condusir eth barranc existent.
Se demore qu’es òbres en camin des Clòses agen ua durada, apuprètz, de tres setmanes, en tot finalizar abantes der inici der iuèrn.
04/11/2021