Notícies Veir istoric
Er Ajuntament de Vielha e Mijaran daurís ua naua convocatòria entà sollicitar ajudes ath comèrç, petites e mejanes empreses, autonòms e òci nocturn deth municipi afectadi pera COVID-19
Eth consistòri establís ua partida de 60.000€ entà paliar es efèctes, e compensar era reduccion d’ingrèssi a conseqüéncia dera COVID-19, en tot impulsar era contunhitat des activitats economiques deth municipi de Vielha e Mijaran
Er Ajuntament de Vielha e Mijaran aufrís ua naua linha d’ajudes as PIMES e autonòms deth municipi, avalorada en 60.000 €, entà ajudar-les a paliar part des efèctes economics patidi com a conseqüéncia dera aparicion dera COVID-19.
En aguest sens, poiràn èster beneficiaris d’aguesta naua ajuda aqueres PIMES e autonòms que poguen acreditar un amendriment minim deth 30% dera sua facturacion annau, en tot préner coma referéncia er an 2020 en relacion a 2019.
Entà d’aguesta convocatòria s’an establit 3 aportacions economiques en foncion deth tipe d’empresa e pèrta d’ingrèssi entre ambdues anualitats. Per un costat, s’autrejarà ua ajuda de 400 € as empreses e autonòms qu’agen redusit entre eth 30% e eth 50% des sòns ingrèssi. I aurà ua dusau aportacion de 600 € as empreses e autonòms qu’agen redusit entre eth 51% e eth 100% des sòns ingrèssi, e era tresau aportacion serà de 2000 €, as negòcis d’òci nocturn, s’era sua reduccion se place entre eth 51 e eth 100% des sòns ingrèssi.
Aguesta ei era dusau ajuda qu’autrege eth consistòri d’ençà dera aparicion dera pandémia. En 2020 s’abilitèc ua partida de 50.000 €, de manèra que damb aguesta naua ajuda, s’auràn liurat 110.000 € entà ajudar ath sector empresariau de Vielha e Mijaran afectat pera COVID-19, se ben, en 2021, s’a includit ar òci nocturn.
Eth periòde entà sollicitar aguesta ajuda ei deth 5 ath 26 de noveme, en tot concedir-se sonque ua ajuda per sollicitant. Es persones juridiques an de presentar era sollicitud a trauès dera sedença electronica der Ajuntament de Vielha e Mijaran (https://vielha-mijaran.eadministracio.cat), mentre qu’es persones fisiques pòden escuélher entre presentar es sollicituds a trauès dera sedença electronica, presenciaument ena Oficina d’Atencion ath Ciutadan der Ajuntament de Vielha e Mijaran (C/ Sarriulèra, 2 de Vielha) o mejançant quinsevolh des sistèmes legaument previsti en article 16.4 dera Lei 39/2015 d’1 d’octobre deth Procediment administratiu comun des administracions publiques.
Tota era informacion sus era convocatòria, bases e documents que cau presentar, se trapen en plana web der Ajuntament de Vielha e Mijaran.
05/11/2021