Notícies Veir istoric
Eth pròplèu 20 de noveme, se celèbre en Vielha un nau talhèr educatiu aeronautic, Kids & Drone Project, dirigit ara mainadèra de 10 a 18 ans
Eth Centre Polivalent de Vielha acuelh aguesta activitat qu’apròpe eth mon des drones as mès joeni, coma airina educatiua e possibla gessuda professionau, en tot realizar batiegi de vòl e conéisher tot sus aguesta naua tecnologia
Eth pròplèu dissabte 20 de noveme, eth Centre Polivalent de Vielha acuelherà era celebracion deth dusau talhèr educatiu aeronautic, Kids & Drone Project, damb eth qu’era mainadèra de 10 a 18 ans (a compdar de 4au de Primària, enquia Bachilierat) gaudiràn d’aguesta naua tecnologia, qu’ei era des drones, en clau educatiua.
Dempús der exit dera prumèra edicion, qu’auec lòc ena primauera, er Ajuntament de Vielha e Mijaran, amassa damb eth Conselh Generau d’Aran e era enterpresa aranesa Pirineos Drone Aviation, tornen a organizar aguesta activitat, que preten establir-se coma ua airina educatiua, e coma possibla gessuda professionau de cara ath futur.
En aguest talhèr, qu’aurà lòc des 10:00 as 19:30 damb sessions d’ua ora, es participaires realizaràn un batieg de vòl damb drones, en tot apréner es aspèctes basics entara metuda a punt, eth sòn pilotatje, es mesures de seguretat e coma a d’èster eth sòn mantenement. Er ensenhament l’amiaràn a tèrme instructors de Pirineos Drone Aviation, de manèra individualizada, en grops per corsi de quate alumnes per instructor. En tot moment, se seguiràn es mesures de seguretat de prevencion dera COVID-19. Ath delà, entre toti es inscrits, se sortejarà un drone Tello.
Es inscripcions son limitades per orde d’inscripcion e se pòden formalizar a trauès deth formulari: https://forms.gle/3jXG92e6pXKnUYFS6, enquiath pròplèu 18 de noveme. Era activitat ei totaument gratuïta.
12/11/2021