Notícies Veir istoric
Er Ajuntament de Vielha e Mijaran e eth Club de Natacion Aran Swim Team signen un convèni de collaboracion
Eth consistòri ajude a sufragar es despenes economiques generades enguan pera entitat, enes activitats amiades a tèrme en Palai d’Espòrts, e enes gessudes as piscines de dehòra deth territòri
Er Ajuntament de Vielha e Mijaran e eth Club de Natacion Aran Swim Team an signat aguest maitin un convèni de collaboracion, damb eth qu’eth consistòri balhe supòrt economic ara entitat entà sufragar despenes relacionades damb es activitats qu’an amiat a tèrme en Palai d’Espòrts de Vielha pendent er an 2021 damb motiu deth barrament dera piscina deth Palai de Gèu, entà dar contunhitat ara activitat esportiua en municipi, en tot fomentar era sua practica entre era joenessa deth pòble.
En aguest sens, tanben ei objècte deth convèni es gessudes deth municipi entara practica, entrenaments e competicions en piscines de dehòra dera poblacion coma activitat esportiva complementària as entrenaments realizadi en Palai d’Espòrts de Vielha.
“Des deth consistòri èm comprometudi damb es entitats deth nòste municipi. Er espòrt dera natacion s’a vist afectat peth barrament temporau deth Palai de Gèu. Totun, a mantengut era sua activitat, e des d’ací les voi arregraïr eth sòn esperit, e demoram ben lèu tornar a poder gaudir d’aguesta installacion, un viatge apariada era estructura”, comente eth baile de Vielha e Mijaran, Juan Antonio Serrano.