Notícies Veir istoric
Er Ajuntament de Vielha e Mijaran e era direccion dera Pedals de Foc Non Stop premanissen era edicion d’enguan d’aguesta pròva de BTT
Era corsa, qu’a Vielha coma lòc de gessuda e d’arribada, aurà lòc der 1 ath 3 de junhsèga, en tot celebrar enguan era 16au edicion
Era edicion d’enguan dera Pedals de Foc Non Stop comence a arténher forma. Era direccion dera Pedals de Foc Non Stop e er equip de govèrn der Ajuntament de Vielha e Mijaran s’an amassat entà iniciar es tramits entà organizar aguesta pròva de BTT, qu’a Vielha coma lòc de gessuda e d’arribada.
Enguan era Pedals de Foc Non Stop celebrarà era 16au edicion, d’ençà dera sua estrea en an 2006, e sonque s’auec de suspéner en 2020 a conseqüéncia dera pandémia dera COVID-19.
Era corsa ei includida laguens deth calendari de pròves dera Real Federación Española de Ciclismo, en tot limitar era participacion a un maxim de 1000 ciclistes. Es inscripcions se dauriràn eth pròplèu 1 de març.
Ua des principaus nauetats d’aguesta 16au edicion ei, qu’ath delà dera modalitat individuau, tanben hi aurà ua modalitat per parelhes (masculines, femenines e mixtes), era quau a estat fòrça ben recebuda e qu’a artenhut fòrça demanda.
Per dusau an consecutiu se poderà hèr eth seguiment des participaires en dirècte, gràcies as dispositius de seguiment GPS que des dera organizacion meten a disposicion des corredors e que permet aufrir ua grana seguretat ath participaire e as familhars, atau coma poder hèr un seguiment exaustiu dera pròva.
En çò que tanh ara pandémia, des dera organizacion seguiràn es protocòus vigenti aprovadi en moment dera pròva.
Era Pedals de Foc Non Stop ei un des eveniments que mès repercusion economica compòrte entath sector toristic de Vielha e Mijaran, pr’amor que se demore lèu 3000 persones pendent tota era dimenjada, en tot compdar as participaires e acompanhants. Era bona situacion respècte ara pandémia, gràcies as campanhes de vacunacion, permet qu’ena edicion d’enguan i pogue auer ua nauta afluéncia de gent en municipi pendent era sua celebracion.
“Era Pedals de Foc Non Stop ei ja un referent esportiu en Vielha e Mijaran, en tot supausar er inici des pròves esportiues ena sason d’ostiu e qu’ajuden a plaçar-mos coma referent esportiu enes Pirenèus”, comente eth baile de Vielha e Mijaran, Juan Antonio Serrano. E ahig que “era repercusion economica ei fòrça importanta, en tot favorir a tot eth sector toristic pendent era dimenjada ena que se dispute era corsa”.
“Arregraïm fòrça ar Ajuntament de Vielha e Mijaran per compdar damb eth sòn supòrt un an mès ena organizacion d’aguest eveniment qu’artenh ua repercussion cada viatge mès grana”, comente eth director dera Pedals de Foc Non Stop, Pep Vega.
16/02/2022