Notícies Veir istoric
Er Ajuntament de Vielha e Mijaran encare era fasa finau des òbres de milhora dera estructura deth Palai de Gèu
En airau des piscines, dempús d’auer finalizat eth sanejament des bigues, s’a pintat eth tet e s’a installat eth nau enlumenat LED, e aguesta setmana se cambiarà eth vas dera piscina grana tà evitar filtracions d’aigua
Es trabalhs de milhora dera estructura deth Palai de Gèu se trapen ena sua fasa finau. Er Ajuntament de Vielha e Mijaran seguís en tot trabalhar entà solventar toti es problèmes que rosigue era installacion esportiua municipau, entà poder procedir ara sua dubertura.
En aguest sens, en airau des piscines ja s’a finalizat bona part des intervencions pendentes. S’a acabat de sanejar e pintar es bigues, s’a plaçat eth nau enlumenat LED que supausarà ua milhora energetica importanta, e pendent aguesti pròplèu dies se procedirà a cambiar eth vas dera piscina grana entà refortilhar era sua impermeabilizacion e evitar que se produsisquen filtracions d’aigua ena planta baisha (enes vestiaris). Era prevision ei que se poguen tornar a daurir as usatgèrs en mes d’abriu.
D’aute biais, en airau dera pista de gèu, pendent aguesti pròplèu dies tanben se finalizarà damb eth sanejament e pintat des bigues, entà contunhar damb eth cambi der enlumenat. Mentre, aguesta setmana començen a trasladar era maquinària de produccion de gèu (es compressors), çò que permeterà daurir-la un viatge siguen finalitzades es òbres.
“Ja mos trapam ena part finau des trabalhs dera 2au fasa de milhora dera estructura deth Palai de Gèu. Des der equip de govèrn trabalham sense descans entà poder daurir era installacion çò de mès lèu possible, damb es milhores garanties de seguretat entàs nòsti usatgèrs e, per açò, tanben auem profitat entà realizar tot un seguit d’intervencions que permeterà qu’era gent pogue gaudir-la enes condicions que meriten e damb ua màger qualitat”, comente eth baile de Vielha e Mijaran, Juan Antonio Serrano.
07/03/2022