Notícies Veir istoric
Vielha acuelherà era 4au edicion deth hestau Mendi Tour es pròplèu 18 e 19 de març
Vielha e Mijaran recupère aguest eveniment a on se projectaràn cinc des milhors films de cinèma de montanha dera darrèra edicion deth Bilbao Mendi Film Festival
Es pròplèu 18 e 19 de març, Vielha tornarà a celebrar ua naua edicion deth hestau de cinèma de montanha Mendi Tour Vielha. Aguest eveniment se celebrèc pendent es ans 2017 e 2019, e s’auec de suspéner es ans 2020 e 2021 a conseqüéncia dera pandémia dera COVID-19.
Pendent aguesta 4au edicion d’aguestes jornades, se projectaràn un totau de 5 pellicules. Diuendres 18 de març, a compdar des 19:00, se començarà damb “Jotunn” (Seccion Oficiau Mendi Festival 2021), dirigida per Mikel Sarasola. Un documentau gravat enes heiredi païsatges d’Islàndia. Eth 2au film se titole “The Traverse” (Prèmi deth Jurat Mendi Film 2021), dirigit per Ben Tibbetts, a on dues hemnes vòlen èster es prumères en esquiar era Haute Route sense escales des de Chamonix enquia Zermatt. E eth prumèr dia s’acabarà damb era projeccion de “Black Ice” (Milhor Pellicula d’Escalada Mendi Film 2021), dirigida per Zachary Barr e Peter Mortimer, que tracte sus un grup d’escaladors neri des Estats Units que viatgen as tèrres sauvatges de Montana.
Dissabte 19 de març, se projectaràn dus films mès a compdar des 19:30. Era prumèra filmacion ei “Action Directe” (Seccion Oficiau Mendi Festival 2021), de Zachary Barr e Josh Lowell, en tot parlar sus era prumèra hemna qu’encadeèc era via ’Action Directe’ (Alemània). E eth hestau finalizarà damb “Mendiak 1976” (Milhor Pellicula d’Aupinisme/Prèmi deth Public Mendi Film 2021) de Luis Arrieta. Eth film parle sus era expedicion navarresa ath Shakhaur (7.116 mètres) en Afganistàn der an 2016, qu’ei considerada “eth prumèr sèt mil basc”.
Era entrada as jornades ei gratuïta, enquia completar er aforament dera sala d’Era Audiovisuau, e se pòt recuélher fisicament ena sedença deth consistòri en orari abituau, de deluns a diuendres, des 08:00 as 14:00.
“Eth hestau Mendi Tour Vielha ei ua apòsta que des der Ajuntament de Vielha e Mijaran volem mantier, pr’amor que supause un element mès qu’ajude ath nòste municipi a assolidar-mos coma destinacion de referéncia de nauta montanha enes Pirenèus”, comente eth baile de Vielha e Mijaran, Juan Antonio Serrano. E ahig que “era bona situacion en relacion ara pandémia mos permet recuperar, pòc a pòc, era normalitat, e eveniments com aguest, mos ajude a auançar en aguest camin”.
Pera sua part, era mairia deth hestau, era aupinista Edurne Pasaban, afirme qu’”ei un aunor poder recuperar aguest eveniment, en quau auram films de fòrça qualitat, damb desparièrs espòrts d’aventura: piragüisme e escalada entre d’auti, e en tot hèr un torn per diuèrsi espòrts d’iuèrn”.
Ath delà, eth prumèr dia deth hestau, ath maitin, er alumnat der Institut d’Aran poirà veir diuèrsi films en un passi privat en Era Audiovisuau. “Volem apropar eth cinèma de montanha as joeni, que son eth futur, e per açò, enguan, coma nauetat, poiràn veir bèth film deth hestau, e jo madeisha les aufrirè ua charrada sus es valors dera montanha”, comente Pasaban.
08/03/2022