Notícies Veir istoric
Finalizen es trabalhs de neteja e mantenement deth dic sus er arriu Nere en Vielha
Er Ajuntament de Vielha e Mijaran a amiat a tèrme era retirada de pèires e tèrres acantierades a compdar des riuades de 2013, en tot milhorar era capacitat de retencion d’elements solids per seguretat en cas de possibles naues riuades
Aguesta setmana s’an finalizat es trabalhs de neteja e mantenement deth dic sus er arriu Nere qu’ei plaçat en Cap dera Vila de Vielha. Ua intervencion plan de besonh, pr’amor que i auie acantierades pèires e tèrres damb ua nautada, apuprètz, de 4-5 mètres conseqüéncia des riuades patides eth 18 de junh de 2013.
S’a rebaishat es graues acumulades laguens deth cabau der arriu Nere, sense veder-se afectada era vegetacion existenta ena ribèra, en tot assolidar ua pendent uniforme.
Er Ajuntament de Vielha e Mijaran a amiat a tèrme aguesta actuacion pendent es darrères setmanes, damb er objectiu de milhorar era capacitat de retencion d’elements solids ath darrèr deth dic ena fasa d’avenguda, en tot velhar pera seguretat deuant d’un possible episòdi de riuades en futur.
Era intervencion a compdat damb un pressupòst de 23.834,85€, en tot recéber ua subvencion per part dera Agència Catalana de l’Aigua.
“Damb aguesta neteja qu’auem amiat a tèrme en dic der arriu Nere, milhoram er estat deth cabau der arriu en Cap dera Vila de Vielha, e refortilham era sua seguretat deuant de possibles naui casi de riuades que se poguen produsir en futur”, comente eth baile de Vielha e Mijaran, Juan Antonio Serrano.
11/03/2022