Notícies Veir istoric
Eth pròplèu deluns 4 d’abriu tornen a daurir es sues pòrtes es piscines deth Palai de Gèu, un viatge acabades es milhores e reformes d’aguest espaci
Deth 4 ath 9 d’abriu i aurà jornades de pòrtes dubèrtes en nau orari dera installacion: de deluns a diuendres des 9 as 13 ores e des 15 as 22 ores e dissabte des 10 as 14 ores e des 16:30 as 21:00
Er Ajuntament de Vielha e Mijaran finalize es trabalhs de milhora en airau des piscines deth Palai de Gèu, damb es quaus se poderà tornar a daurir aguest espaci ath public a compdar deth pròplèu 4 d’abriu.
Deth 4 ath 9 d’abriu, i aurà jornades de pòrtes dubèrtes, en nau orari dera installacion: de deluns a diuendres des 9 as 13 ores e des 15 as 22 ores e dissabte des 10 as 14 ores e des 16:30 as 21:00.
Pendent aguesta setmana, s’a procedit ath ramplit d’aigua dera piscina grana, damb eth que se met eth punt finau a un seguit d’actuacions de milhora deth sector des piscines pendent es darrèri mesi.
Es trabalhs s’inicièren damb eth sanejament e pintat des bigues, laguens dera 2au fasa de milhora dera estructura, que se trapèc en un estat fòrça maumerenc en 2021 e qu’obliguèc ath barrament dera sua activitat. Ath delà, en tot profitar aguesta intervencion, tanben se procedic a cambiar eth vas dera piscina grana, en tot milhorar era sua impermeabilizacion, pr’amor que generaue filtracions d’aigua ena planta baisha. E, tanben se realizèc era substitucion der antic enlumenat, peth nau sistèma de lums LED, que favorirà era generacion d’ua màger eficiéncia energetica en tot er airau des piscines.
Parallelament, eth consistòri tanben a procedit a substituir era vielha maquinària e aparelhs de musculacion deth gimnàs per uns mès modèrni. Concretament son: 11 maquines de musculacion, 4 bancs, 8 barres olimpiques, 54 discs olimpics, 1 supòrt entàs barres olimpiques e 4 supòrts entàs discs olimpics.
01/04/2022