Notícies Veir istoric
Vielha acuelherà era celebracion deth prumèr CapraboFest eth pròplèu 28 de mai
A compdar des 18:30, en parcatge des antigues casèrnes militares aurà lòc era actuacion dera cantaira aranesa, Alidé Sans, e deth grop catalan, Doctor Prats
Aué s’a presentat ena sala de plens der Ajuntament de Vielha e Mijaran era prumèra edicion deth CapraboFest, hestau organizat per Caprabo damb era collaboracion der Ajuntament de Vielha e Mijaran. Er eveniment aurà lòc eth pròplèu 28 de mai, a compdar des 18:30, en parcatge des antigues casèrnes militares de Vielha.
En aguest concèrt es artistes convidadi son: Alidé Sans, cantaira aranesa que interpretarà era banda sonora deth nau spòt publicitari de Caprabo, e Doctor Prats, banda catalana que presentarà es cançons deth sòn nau disc “Pel cantó bó”.
Eth concèrt ei gratuït, dubèrt a toti es publics e aurà ua durada, apuprètz, de dues ores e mieja.
Eth CapraboFest ei un hestau que s’emmarque laguens dera naua campanha lançada per Caprabo “Benvinguda la Vida”, a on Alidé Sans ei era compositora e cantaira dera cançon deth spòt qu’era enterpresa de supermercats a hèt en aranés.
Er objectiu des organizadors ei qu’eth CapraboFest sigue un eveniment itinerant, que cada an anarà per desparières localitats de Catalonha damb diuèrsi cantaires e grops musicaus.
“Èm contènti de collaborar damb Caprabo ena celebracion dera prumèra edicion deth CapraboFest en Vielha, pr’amor qu’auram era escadença d’escotar a ua des nòstes cantaires, coma ei Alidé Sans, ena collaboracion qu’a hèt damb Caprabo, e a un des grops capdeuantèrs en Catalonha, coma ei Doctor Prats, en tot apropar era cultura musicau ara nòsta gent”, comente eth dusau tinent d’alcalde de Vielha e Mijaran, Alberto López. E ahig que “arregraïm especiaument a Caprabo, enterpresa damb mès de 30 ans en nòste municipi, qu’apòste pera cultura, e qu’age pensat en nòste municipi entà celebrar era prumèra edicion d’aguest hestau”.
Pera sua part, eth director de desvolopament corporatiu de Caprabo, Jordi Lahiguera, comente que “eth nòste objectiu ei qu’aguesta prumèra edicion deth CapraboFest sigue ua hèsta entàs aranesi e araneses. Demoram que fòrça gent i vage e pogue gaudir d’un concèrt de musica de naut nivèu”.