Notícies Veir istoric
Deth 9 ath 12 de junh Era Audiovisuau de Vielha acuelh era representacion dera òbra de teatre musicau “Kytzia”
Er alumnat dirigit per Miguel Pineda interpretarà desparièrs numeròs musicaus damb era cultura egipcia coma hiu conductor, en tot requectar sòs destinadi ara mainadèra des colònies d’ostiu dera Associacion Espanhòla Contra eth Càncer
Deth 9 ath 12 de junh, tornen es representacions de teatre musicau en Era Audiovisuau de Vielha. Dempús de dus ans sense poder realizar-se a conseqüéncia dera pandémia deth COVID-19, enguan se recupère era normalitat, en tot interpretar era òbra “Kytzia”.
En aguest nau espectacle, damb guidon e direccion de Miguel Pineda, qu’aurà lòc entàs 19 ores, damb un totau de 4 foncions d’1 ora de durada, er alumnat interpretarà desparièrs numeròs de balh e musica damb Egipte coma hiu conductor, en tot idear ua istòria imaginària damb era Val d’Aran coma lòc a on se desvolòpe era accion. Toti/es es actors/itzes que participen en teatre musicau son aranesi/es.
Es entrades, a un prètz de 5€, se pòden aquerir ena recepcion der Ajuntament de Vielha e Mijaran, en orari d’atencion ath public des 8 as 14 ores, e ena Merceria Carisa de Vielha (Avenguda Castièro, 17, locau 3).
Toti es sòs requectadi anaràn destinadi ara mainadèra que realize es colònies d’ostiu ena Val d’Aran damb era Associacion Espanhòla Contra eth Càncer (AECC), que dempús de dus ans sense poder-se realizar peth COVID-19, enguan tornaràn a visitar eth nòste territòri.
Eth teatre musicau compde damb era collaboracion der Ajuntament de Vielha e Mijaran e deth Conselh Generau d’Aran.
“Èm contènti de poder recuperar es foncions de teatre musicau abituaus abantes dera pandémia, coma espectacle culturau que se desvolòpe pendent tot er an en nòste municipi. Ath delà, manten un esperit solidari damb era mainadèra des colònies d’ostiu dera AECC, qu’enguan tornen entath nòste territòri, e que credem qu’ei de besonh balhar-les supòrt”, comente eth baile de Vielha e Mijaran, Juan Antonio Serrano.
Pera sua part, eth director der espectacle, Miguel Pineda, remèrque que “aguest musicau ei hèt integrament per gent dera Val d’Aran, a qui voi arregraïr era sua dedicacion non sonque damb era actuacion, senon tanben damb eth dessenh deth vestiari”. E ahig que “auem fòrça ganes de mostrar ara gent aguesta foncion que se comencèc en 2019, e que dempús dera pandémia fin finau podem aufrir-la entà que la gaudisque”.
01/06/2022