Notícies Veir istoric
Es alumnes dera Escòla Garona meten a pròva eth nau camin escolar
Aguest deluns s’a iniciat era experiéncia pilòt d’aguest projècte que vò promòir anar a pè, en biciclèta o patinet enquiara escòla en tot seguir un camin segur e senhalitzat
Pendent aguesta setmana, era Escòla Garona de Vielha e er Ajuntament de Vielha e Mijaran impulsen era iniciativa “Camin Escolar Segur”. Ua pròva pilòt que supause era implementacion d’un camin senhalizat e segur entà qu’era mainadèra pogue anar peth maitin entara escòla a pè, en biciclèta o patinet.
Aguesta activitat, que nèish dera comission verda deth centre escolar, preten crear diuèrses rotes entà garantir as pairs/mairs qu’es sòns/sues hilhs/es pòden anar entara escòla damb totau seguretat. En aguest sens, aguesta pròva pilòt ara madeish contemple dues rotes: Ua que ges des dera Escòla Mairau “Era Cunhèra” e des dera Plaça d’Aran, en tot junher-se ena passarèla de husta que i a darrèr der Espitau Val d’Aran, e seguir amassa peth passèig fluviau deth Solan. Eth dusau camin prepausat ei entara mainadèra de Betren, mès cuert, pr’amor qu’ei apròp dera Escòla Garona.
Era iniciativa preten conscienciar ara mainadèra de quina ei era manèra mès segura d’anar enquiara escòla, en tot trauessar carrèrs damb veïculs, e que pèrden males abituds ara ora de crotzar-les.
Era pròva pilòt s’a iniciat damb es alumnes dera Escòla Garona, damb era intencion de que se pogue establir en futur. Ath delà, ei dubèrta era possibilitat de qu’er Institut d’Aran pogue adoptar-la mès endeuant entà realizar eth madeish recorregut.
“Des der Ajuntament de Vielha e Mijaran volem facilitar qu’es mainatges e mainades poguen anar solets entara escòla e per aguest motiu auem consensuat damb era comunitat educatiua aguesta pròva pilòt”, comente eth còsso d’ensenhament de Vielha e Mijaran, Alberto López. E ahig que ”ath delà, aguesta iniciatiua a coma objectiu conscienciar ara mainadèra sus eth respècte ath miei ambient, era sostenibilitat e era responsabilitat damb bones abituds qu’an d’aquerir quan van entara escòla en tot trauessar carrèrs ”.
14/06/2022