Notícies Veir istoric
Vielha inície aguesta setmana era sason de competicions esportiues d’aguest ostiu damb era arribada dera 4au etapa e era gessuda dera 5au etapa dera Transpyr Coast to Coast 2022
Eth cicle de competicions esportiues s’alongarà pendent tot er ostiu damb ua repercusion importanta entath sector toristic, en tot assolidar Vielha e Mijaran coma epicentre enes Pirenèus en airau des espòrts sostenibles
Vielha se premanís aguesta setmana entà acuélher era pròva ciclista dera Transpyr Coast to Coast 2022. Un eveniment qu’amasse a lèu 300 participaires que crotzen eth Pirenèu des de França enquiara Còsta Brava en 7 dies, e qu’aurà ath cap-lòc dera Val d’Aran coma lòc d’arribada e gessuda de dues etapes.
Damb aguesta pròva, Vielha e Mijaran inície eth cicle de competicions esportiues que s’alongarà pendent tot er ostiu, en tot plaçar eth municipi en un lòc capdeuantèr enes Pirenèus en aguest airau, e generar ua repercusion economica fòrça importanta entath sector toristic.
Per un costat, dimèrcles era pròva arribarà en Vielha en tot finalizar era 4au etapa d’aguesta competicion damb gessuda ena localitat francesa de Bagnères-de-Bigorre, damb un totau de 107 kms e 3500 mètros de desnivèu positiu. Dijaus, era 5au etapa gesserà de Vielha en direccion a La Seu d’Urgell en tot completar un totau de 2800 mètros de desnivèu positiu.
Era
Transpyr Coast to Coast comencèc eth passat 12 de junh en
Saint-Jean-de-Luz e finalizarà eth pròplèu 18 de junh en Roses
(Girona). Era pròva ei dividida en dues categories: individuau o per
parelhes (Mixta, Femenina, Masculina, Master o Grand Master).
“Èm contenti de poder compdar un an mès damb era preséncia dera Transpyr Coast to Coast en nòste municipi, en tot acuélher ua nauta quantitat de participaires, e fomentar era practica der espòrt en uns païsatges unics qu’auem en nòste territòri”, comente eth baile de Vielha e Mijaran, Juan Antonio Serrano. E ahig que “dam per iniciada era sason de competicions esportiues d’enguan, en un ostiu plen de pròves que mos assoliden coma epicentre des Pirenèus a nivèu d’espòrts sostenibles, en tot supausar ua repercusion economica importanta entath sector toristic”.
15/06/2022