Notícies Veir istoric
Eth plen der Ajuntament de Vielha e Mijaran apròve era 4au modificacion de credit deth pressupòst d’enguan, damb eth que se poirà invertir en importantes òbres en municipi
Se reurbanizarà eth carrèr Comets de Vielha, en tot convertir-lo en ua plaça, e bastir-i un parc infantil, e ua zòna de descans damb bancs
Eth plen der Ajuntament de Vielha e Mijaran a aprovat aguest dimèrcles era 4au modificacion de credit deth pressupòst d’enguan, damb era que se poirà amiar a tèrme diuèrses intervencions importantes en municipi.
Un des projèctes subergessents ei era reurbanizacion deth carrèr Comets de Vielha, en tot convertir-lo en ua plaça, en tot guanhar fòrça mès espaci. D’aguesta manèra, ei previst crear un parc infantil, atau coma ua zòna de descans damb mobiliari urbans coma pòden èster es bancs. Un projècte fòrça de besonh, pr’amor qu’en parçan deth Solan i a mancança d’aguest tipe d’espacis.
D’aute biais, tanben ei previst que damb aguesta modificacion de credit se finance eth 40% deth projècte dera EMD de Gausac de pavimentacion dera carretèra de Gausac des der airau de Matet enquiara glèisa de Sant Martin de Tours.
Aguesta modificacion de credit a un pressupòst totau d’1.211.759,82€, finançada ath 100% per romanent de tresaureria, e qu’a estat aprovada damb es vòts a favor d’Unitat d’Aran, era abstencion de Convergéncia Aranesa e eth vòt en contra d’Aran-Amassa.
“Ei fòrça important auer aprovat aguesta modificacion de credit entà poder seguir en tot hèr milhores en municipi pendent es pròplèu mesi”, comente eth baile de Vielha e Mijaran, Juan Antonio Serrano.
En madeish plen tanben s’a aprovat eth convèni de delegacion de competéncies de gestion forestau a favor deth Conselh Generau d’Aran. Ua mesura qu’ei de besonh, pr’amor qu’era gestion sostenibla des bòsqui ei un des rèptes de futur des municipis dera Val d’Aran, autant a nivèu tecnic, juridic e ambientau, coma sòcioeconomic. Ath delà, damb eth cambi climatic, se pòt generar era preséncia de plagues, atau coma un possible aument d’incendis damb grèus conseqüéncies entara fauna e flòra. Sense desbrembar, qu’aué dia eth sector forestau represente ua activitat escassa, a despièt d’auer un excès de densitat e envielhiment des masses arbòries.
Damb aguest convèni se preten milhorar era gestion forestau, includits es profitaments forestaus de husta, de manèra ordenada. Atau madeish, demoren excludidi es profitaments agricòles e ramadèrs, sonque se contemple eth profitament de husta e lenha. Tanben contribuirà ara milhora de lòcs de trabalh, milhorarà era foncion sòcioeconomica des masses forestaus e mobilizar recorsi, contribuirà en aprovediment energetic e ena neutralitat de carbòni, e se divulgarà es trabalhs de gestion forestau e de profitaments des productes deth bòsc.
Damb aguest convèni se crearà ua Comission Forestau, a on i aurà representants de totes es pedanies, que velharà pera presa de decisions e establiment de linhes generaus d’ua manèra coordinada e coerenta.
Aguest punt s’a aprovat damb es vòts a favor d’Unitat d’Aran e es vòts en contra de Convergéncia Aranesa e Aran-Amassa.
“Aguest convèni sus era gestion forestau ei un punt de partida entà perméter afrontar es rèptes mès propèrs, vertebrar ua dinamica de presa de decisions coerenta a trauès d’ua Comission Forestau, e veir ua airina dinamizadora dera gestion deth miei naturau”, puntualize Serrano.
16/06/2022