Notícies Veir istoric
Vielha e Mijaran receberà lèu 4000 corredors ena 2au edicion dera Val d’Aran by UTMB® qu’aurà lòc deth 7 ath 10 de junhsèga
Vielha serà eth lòc de gessuda e d’arribada dera corsa Torn dera Val d’Aran (VDA) de 161 kms, e d’arribada dera corsa Peades d’Aigua (PDA) de 55 kms e dera Camins d’Hèr (CDH) de 105 kms
Vielha e Mijaran, e eth conjunt dera Val d’Aran, se premanís entà acuélher era 2au edicion dera Val d’Aran by UTMB®, qu’enguan a lòc deth 7 ath 10 de junhsèga, en tot ampliar de 3 a 4 es dies de competicion oficiau.
Lèu 4000 participaires arribadi de 70 païsi de tot eth mon preneràn part enes desparières pròves que s’an premanit, en tot generar un gran impacte economic en conjunt deth sector toristic de Vielha e Mijaran, a on se demore mès de 15000 sojorns, e ua repercusion ath torn d’1 milion d’èuros.
Vielha
e Mijaran s’assolide coma epicentre esportiu en Pirenèu, en tot
èster lòc de gessuda e arribada de lèu totes es modalitats. Dijaus
7 de junhsèga, Vielha receberà era arribada dera Peades d’Aigua
(PDA), de 55 kms e 3300 mètres de desnivèu positiu, damb gessuda en
Salardú. Diuendres 8 de junhsèga, entàs 16 ores, Vielha serà eth
lòc de gessuda dera distància estrelha, era Torn dera Val d’Aran
(VDA) de 161 kms e 10.200 mètres de desnivèu positiu, e se demore
as corredors ena arribada, programada a compdar de dissabte 9 de
junhsèga. Fin finau, Vielha tanben receberà era arribada dera Camin
d’Hèr (CDH) de 105 kms e 6100 mètres de desnivèu positiu eth
diuendres, damb gessuda en Les.
Era ceremònia de liurament de prèmis dera VDA e dera CDH aurà lòc dimenge 10 de junhsèga entàs 12 ores ena Plaça dera Glèisa de Vielha.
Era Val d’Aran by UTMB® autrejarà as dètz prumèrs òmes e hemnes de cada corsa, ua plaça dirècta ena categoria que participen, entà préner part dera Trail de Mont-Blanc.
Ath delà, pendent toti es dies de disputa dera Val d’Aran by UTMB, i aurà plaçat eth village ena Plaça dera Generalitat de Vielha, damb fòrça marques esportiues de nivèu internacionau.
Pendent es 4 dies de competicion i aurà 14 ores de programacion diària en dirècte en desparièrs idiòmes (espanhòu, francés e anglés) e des de China tanben se realizarà un seguiment fòrça complèt des corses damb fòrça connexions.
“Per dusau an, èm deuant d’ua des competicions esportiues mès importantes que Vielha e Mijaran e era Val d’Aran acuelh ath long der an. Damb lèu 4000 participaires, era Val d’Aran by UTMB plaçarà eth nòste territòri en mapa internacionau der espòrt, en tot acuélher participaires de 70 païsi de tot eth mon”, comente eth baile de Vielha e Mijaran, Juan Antonio Serrano. E ahig que “era repercusion economica que se demore ei fòrça importanta, en benefici deth conjunt deth sector toristic deth municipi, que pendent tot aguest ostiu trabalharà de valent enquia seteme”.
06/07/2022