Notícies Veir istoric
Vielha e Mijaran tornarà a èster er epicentre deth trail running e era BTT pendent aguesta dimenjada
Dissabte se celebrarà era 5au Trail Vielha-Molières 3010 e era 8au Era Ròda Non Stop de BTT, e entre ambdues competicions i aurà 1000 participaires, qu’aportaràn 4000 sojorns, damb ua repercusion economica de mès de 300.000€
Aguesta dimenjada, Vielha e Mijaran celebrarà dues competicions esportives de trail running e de BTT, qu’auràn lòc dissabte 16 de junhsèga, damb gessuda e arribada en Vielha.
Per un costat, se disputarà era 5au edicion dera Trail Vielha-Molières 3010. Ua pròva qu’en pòqui ans a artenhut ua repercusion fòrça importanta en mon des pròves de montanha (trails).
I aurà es 2 modalitats ja abituaus: Era Molières Maraton (43 Kms e 4200 mètres de desnivèu positiu) e era Montpius Skyrace (23 Kms e 1800 mètres de desnivèu positiu). Coma en edicions anteriores, i aurà participaires non sonque d’Espanha, senon tanben arribadi de desparièrs païsi d’Euròpa, en tot remercar eth caire internacionau qu’a era pròva.
Ath delà, Era Ròda Non Stop de BTT, que tanben se celèbre dissabte, artenh enguan era 8au edicion. Era pròva aurà 4 categories: Era Ultramarathon (120 kms e 4100 mètres de desnivèu positiu), era Marathon (55 kms e 2000 mètres de desnivèu positiu), era e-Bike (55 kms e 2000 mètres de desnivèu positiu, mès damb reglament diferenciat ara categoria BTT) e, coma nauetat, era Gravel (67 kms damb 2000 mètres de desnivèu positiu).
Entre ambdues competicions i aurà ath torn de 4000 sojorns, en tot supausar ua repercusion economica de mès de 300.000€ en benefici de tot eth sector toristic deth municipi.