Notícies Veir istoric
Er Ajuntament de Vielha e Mijaran organize aguesta tardor eth cicle “Teatre Familhar 2022” que s’amiarà a tèrme un viatge ath mes, de seteme a deseme
Era Audiovisuau de Vielha acuelherà un totau de 4 espectacles variadi, damb entrada a 5 €, enes que i aurà fòrça diversion entà tota era familha un dissabte ath mes
Er Ajuntament de Vielha e Mijaran torne a méter en foncionament aguesta tardor eth cicle “Teatre Familhar 2022” damb eth qu’aufrirà espectacles entà que toti es membres dera familha poguen gaudir d’ua serada tanplan divertida, entre es mesi de seteme e deseme.
Dempús der exit dera edicion de 2021, enguan s’a premanit un nau cicle compausat de 4 espectacles qu’auràn lòc un viatge ath mes, ena jornada de dissabte, a compdar des 18 ores ena Sala Era Audiovisuau de Vielha.
Eth cicle s’encète eth 24 de seteme, damb era actuacion que pòrte per nòm “Desperta” (dera companhia Jordi del Río), qu’ei ua òbra de teatre familhar ena que i a fòrça umor e imaginacion que desvelhen es emocions e es sentiments. 5 istòries que haràn arrir e emocionar as assistents.
Eth 22 d’octobre, era actuacion “Histriònic” (dera companhia El Replà Produccions), mos portarà ua comédia esvagada e lhòca dirigida a tota era familha.
Eth 26 de noveme, arribe era òbra “L’Odissea del Riure Perdut” (dera companhia Teatre Mòbil), damb un espectacle que mos harà arrir fòrça, en un viatge plen d’umor e fantasia.
E, fin finau, eth 17 de deseme, entà barrar eth cicle, aurà lòc er espectacle “Hamelí” (dera companhia Xip Xap), damb un espectacle basat en conde popular que manten viua ua esséncia qu’ei de besonh condar.
“Er equip de govèrn der Ajuntament de Vielha e Mijaran auem establit un programa variat entà que pendent aguesta tardor tota era familha pogue gaudir de diuèrsi espectacles agradius”, comente era còsso de cultura, Raquel Martínez. E ahig que “era bona acuelhuda qu’aguest tipe d’activitats culturaus a enes familhes mos permet seguir en tot apostar per apropar companhies de prestigi, en tot emplegar, en aguest cas, Era Audiovisuau coma lòc de celebracion d’aguesti espectacles”.
22/09/2022