Notícies Veir istoric
Aguesta setmana tornen a èster en foncionament es corsi de patinatge artistic dera Escòla de Parinatge en Palai de Gèu de Vielha
Damb era redubertura dera pista de gèu, se torne a aufrir eth 100% des servicis abituaus laguens d’aguesta installacion esportiua de Vielha e Mijaran
A compdar d’aguesta setmana, era Escòla de Patinatge deth Palai de Gèu torne a aufrir es corsi de patinatge artistic ena pista de gèu deth Palai de Gèu de Vielha, un viatge qu’aguest equipament torne a èster operatiu.
En totau, i a 4 nivèus: Iniciacion (deluns e dimèrcles), Auançat (dimars e dijaus), Tecnificacion (deluns, dimars e dijaus) e Competicion (de deluns a diuendres). Enes classes s’an premanit es basses de patinatge en foncion des reglaments des federacions d’Espanha, Catalonha e França, atau coma era federacion internacionau.
D’aguesta manèra, eth Palai de Gèu torne a aufrir eth 100% des servicis qu’èren abituaus abantes dera sua arturada forçada per un problèma fòrça grèu ena estructura, qu’obliguèc ar Ajuntament de Vielha e Mijaran a barrar era installacion en abriu de 2021.
Des d’alavetz, eth consistòri trabalhèc ena reparacion dera estructura, atau coma ena milhora de tot er equipament, autant en airau des piscines coma en dera pista de gèu. Prumèrament, se tornèc a daurir era planta baisha, dempús siguec eth torn der airau des piscines e, fin finau, era pista de gèu, a on ja se podec gaudir d’un stage de tecnificacion dera Federació Catalana d’Espòrts d’Hivern ena dimenjada deth 23 ath 25 de seteme. Ara, damb es corsi de patinatge, torne era activitat ara sua normalitat.
“Èm fòrça contenti de qu’era mainadèra pogue tornar a gaudir des corsi de patinatge artistic qu’èren abituaus abantes deth barrament pes problèmes ena estructura deth Palai. Damb eth retorn deth patinatge ja auem eth 100% des servicis dera installacion municipau en foncionament, des quaus en gaudissen non sonque es vesines e vesies de Vielha e Mijaran, senon de tota era Val d’Aran, atau coma es visitaires qu’auem ath long der an”, comente eth baile der Ajuntament de Vielha e Mijaran, Juan Antonio Serrano.
06/10/2022