Notícies Veir istoric
Eth nau Skate Park de Vielha ja ei en foncionament
Er Ajuntament de Vielha e Mijaran a bastit aguest nau equipament esportiu municipau en Eth Solan, qu’aucupe uns 800 m² e qu’ei dividit en 3 airaus: Zòna de Miniramp, Zòna de Bowl e Zòna de Street
Vielha e Mijaran dispause a compdar d’aguesta setmana d’un nau equipament esportiu municipau: Er Skate Park de Vielha.
Er Ajuntament de Vielha e Mijaran a bastit aguesta installacion en Eth Solan, ath cant deth Palai d’Espòrts, en un terren qu’aucupe un espaci d’uns 800 m², e se compause de 3 airaus: Ua Zòna de Miniramp, ua Zòna de Bowl (damb ua banhèra de 2 mètres de radi de transicions, e desparières nautades segontes era zòna e es extensions. Era nautada minima ei d’1 mètre, e era maximala d’1,5 mètres. I a zònes sense coping, d’autes damb coping metallic, d’autes damb loseta de pèira, zòna de spine, eca…) e ua Zòna de Street (ei era superfícia planèra e part deth talhús qu’entornege eth Bowl).
Ath delà, sus eth talhús tanben i trapam rampes e plans inclinadi. En centre der espaci qu’ei entre era miniramp e eth bowl i trapam un “funbox”, un modul damb multiples rampes, caishons, un rainbow, eca. E, ath cant dera miniramp, i trapam un caishon planèr e un aute modul damb dus plans inclinadi. Ena entrada der skate park i a ua zòna de “rails”, amassa damb eth mur exterior deth bowl.
Er equip de govèrn deth consistòri balhe responsa a ua demana dera joenessa deth municipi, en tot complementar era aufèrta esportiua e de léser, en un endret a on tanben s’i place eth Palai de Gèu, eth Palai d’Espòrts, es pistes de fronton, de pàdel e era naua poliesportiua exteriora.
Aguest skate park s’a bastit en sonque dus mesi e a compdat damb un pressupòst de 128.392,93 €.
En 2022, eth consistòri a estreat dues installacions esportiues naues, pr’amor qu’ath delà der skate park, tanben se bastic era naua pista poliesportiua exteriora, que se trape ath cant dera pista de pàdel, e que permet practicar futbòl e bàsquet ar aire liure.
“Des der equip de govèrn der Ajuntament de Vielha e Mijaran èm satisfèti de poder aufrir ara joenessa de Vielha e Mijaran aguest nau skate park, qu’ei ua demana qu’aguest collectiu mos auie transmetut, e qu’a compdar d’ara poderàn gaudir en un endret a on s’i trapen es principaus equipaments esportius municipaus”, comente eth dusau tinent d’alcalde de Vielha e Mijaran e còsso d’espòrts, Alberto López. E ahig que “entà nosati era joenessa ei un sector dera societat fòrça important e, en aguest sens, enguan auem hèt un esfòrç important entà qu’agen dues installacions esportiues naues, damb er skate park e era pista poliesportiua exteriora, que pendent tot er ostiu e aguesta tardor, fòrça gent a emplegat (e emplegue) entà poder practicar espòrt ar aire liure”.