Notícies Veir istoric
Finalize era prumèra part des òbres de milhora dera pavimentacion ena Carretèra de Gausac
Se milhore er accès a Gausac des de Vielha, en tot organizar aguest endret entà evitar un parcatge descontrolat de veïculs en epòques de nauta preséncia toristica, e fomentar un espaci de passèig de pedonhs enquiara glèisa de Sant Martin de To
Pendent aguesti prumèri dies de noveme, s’a finalizat era prumèra part deth projècte de milhora dera pavimentacion ena Carretèra de Gausac. Ua intervencion que balhe mès qualitat ar accès ath pòble de Gausac des de Vielha.
Aguest projècte ei executat pera Entitat Descentralizada de Gausac, damb un pressupòst de 368.248,41 €, que compde damb un finançament de 180.000 € per part der Ajuntament de Vielha e Mijaran, e ua petita aportacion deth Plan d’Inversions Locaus.
Damb aguesta intervencion s’organize aguest endret entà evitar un parcatge descontrolat de veïculs, sustot, en epòques de nauta preséncia toristica, e fomentar un espaci de passèig de pedonhs enquiara glèisa de Sant Martin de Tours. Precisament, s’amplie er espaci entà trepadèr enquia 2,60 mètres, e era cauçada entàs veïculs serà de 5 mètres.
Era execucion actuau s’a hèt pendent ua vintia de dies, mès, a conseqüéncia dera arribada des baishes temperatures, e era possibilitat de nheuades, s’an arturat es òbres, que se contunharàn ena primauera, damb er engodronat dera carretèra.
“Aguesta ei ua òbra qu’es vesins e vesies de Gausac hège fòrça ans que demanauen, e ara auem podut arténher guanhar espaci d’amplada entà poder auer un trepadèr en condicions en accès ath pòble. Per ara, ac hèm entre es blòcs de Bodigues e era glèisa de Sant Martin de Tours”, comente eth president dera EMD de Gausac, Jesús Ordoñez.
Pera sua part, eth baile der Ajuntament de Vielha e Mijaran, Juan Antonio Serrano, ahig que “des deth consistòri entenem eth besonh de realizar aguesta milhora ena Carretèra de Gausac e, per açò, collaboram damb ua aportacion fòrça importanta entà desvolopar aguest projècte. Fòrça gent transite per aguest entorn, en tot anar peth camin de Beussa e era glèisa de Sant Martin de Tours, que son un gran patrimòni deth municipi, e meriten un accès en condicions”.
04/11/2022