Notícies Veir istoric
Eth plen der Ajuntament de Vielha e Mijaran apròve adaptar es Normes Subsidiàries e Complementàries de Planejament dera Val d’Aran, en airau der Espitau dera Val d’Aran
Damb aguesta aprobacion se permet era adequada flexibilitat ena organizacion foncionau e en futur creishement der equipament sanitari assistenciau
Aguest maitin, eth plen der Ajuntament de Vielha e Mijaran, amassat en session extraordinària, a aprovat era adaptacion deth planejament generau vigent en Vielha e Mijaran, des Normes Subsidiàries e Complementàries de Planejament dera Val d’Aran, en airau der Espitau dera Val d’Aran.
Damb aguesta aprobacion se permet era adequada flexibilitat ena organizacion foncionau e en futur creishement der equipament sanitari assistenciau, atau coma facilitar era formalizacion des cessions obligatòries de sistèmes, actuaument pendentes de materializar, maugrat trapar-se er airau dejà urbanizat.
Ath delà, en plen tanben s’a aprovat iniciaument era relacion de lòcs de trabalh deth consistòri, autant de personau foncionari, eventuau e laborau. Ara s’expausarà ath public era nomentada relacion, pendent eth tèrme de quinze dies obrièrs a compdar des deth següent ath dera publicacion deth corresponent anonci en Bulletín Oficiau dera Província. Era relacion se considerarà definitiuament aprovada se pendent eth citat tèrme non se presenten reclamacions.