Notícies Veir istoric
Eth plen der Ajuntament de Vielha e Mijaran reapròve iniciaument era modificacion des Normes Subsidiàries e Complementàries de Planejament dera Val d’Aran entà installar plaques solares
En plen d’aguest dimèrcles, s’an includit es modificacions qu’era Comission d’Auviatge deth Conselh Generau d’Aran hec ara prumèra prepausa aprovada en 2022 peth consistòri
Aguest maitin, eth plen der Ajuntament de Vielha e Mijaran a tornat a aprovar iniciaument era modificacion des Normes Subsidiàries e Complementàries de Planejament dera Val d’Aran entara installacion de plaques solares.
Aguesta reaprobacion s’amie a tèrme dempús de qu’era Comission d’Auviatge deth Conselh Generau d’Aran hesse diuèrses modificacions ara prumèra regulacion aprovada peth consistòri en mai de 2022.
D’aguesta manèra, en tot seguir es recomanacions dera Comission d’Auviatge, enes bastisses principaus deth casc antic sonque se poderà installar plaques solares integrades ara cubèrta. Per tant, demore dehòra era opcion d’installar-les en d’auti emplaçaments previsti ena anteriora regulacion. Ena rèsta de bastisses deth casc antic òc que se poderàn plaçar-ne adossades ara cubèrta e en d’auti emplaçaments (tèrra, murs, eca).
Aguesta modificacion a estat aprovada damb es vòts a favor deth govèrn municipau d’Unitat d’Aran e deth grup de Convergéncia Aranesa e era abstencion d’Aran-Amassa.
Aguesta modificacion ara demore dubèrta a exposicion publica entà poder presentar allegacions e dempús tornarà ara Comission d’Urbanisme entara sua aprobacion definitiua.
D’aute biais, eth plen a aprovat tanben eth plan estrategic de subvencions de Vielha e Mijaran entà 2023 e 2024. Un document que supause ua huelha de rota entara gestion e planificacion dera politica de subvencions municipau. I demoren reflectidi es convènis deth pressupòst e es subvencions de liure concorréncia enes diuèrsi airaus: cultura, espòrts, eca. Un document que non ei fixe, e que pòt patir modificacions. Ua airina que mòstre transparéncia en airau des subvencions damb es collectius implicadi.
Aguest punt a estat aprovat damb es vòts a favor d’Unitat d’Aran e era abstencion dera oposicion de Convergéncia Aranesa e Aran-Amassa.
25/01/2023