Notícies Veir istoric
Era Entitat Municipau Descentralizada de Betren se trape en tot finalizar era reforma integrau dera sala sociau
S’a equipat eth locau damb enlumenat LED entà garantir un estauvi energetic, s’a apariat eth solèr, s’an milhorat es servicis basics damb un nau lavabo adaptat ena planta baisha e un ena prumèra planta
Pendent aguestes darrères setmanes, era Entitat Municipau Descentralizada de Betren se trape en tot realizar ua ampla e complèta reforma dera sala sociau deth pòble. Ua intervencion qu’ère fòrça de besonh entà poder condicionar aguest espaci que meritaue un lauat d’imatge.
En aguest sens, s’a realizat un cambi deth solèr dera sala, que ja presentaue un estat fòrça maumerenc peth pas deth temps. Atau madeish, tanben s’a modificat era distribucion de cèrti espacis dera sala. Per un costat, era sala de magasèm s’a modificat en tot transformar-se en un nau lavabo adaptat entà persones andicapades, e a on i ère eth lavabo s’i a plaçat ara er actuau magasèm.
Ena prumèra planta s’i a installat un petit lavabo, entà evitar qu’es usatgèrs que siguen en aguest endret agen de baishar enquiara planta baisha.
Atau madeish, s’a substituït er enlumenat antic de tota era sala per un nau sistèma de lums LED que garantirà ua milhora e estauvi energetics.
Era darrèra intervencion que manque entà acabar aguest projècte integrau ei era installacion d’ua rampa d’accès ena entrada dera sala entà favorir er accès as persones damb mobilitat redusida, e qu’ei previst que sigue prèsta aguesta madeisha setmana.
Aguest projècte de reforma integrau dera sala sociau a compdat damb un pressupòst de 33.439,27 €, finançat pera EMD de Betren, qu’a compdat damb ua subvencion de 8.500 € deth Plan d’Inversions Locaus dera Diputació de Lleida.
“Damb aguesta reforma integrau ena sala sociau, des dera EMD garantim ua milhora considerabla d’aguest espaci, en tot aumentar era qualitat des servicis basics entàs desparièrs emplecs que s’i poguen amiar a tèrme ath long der an (amassades, hèstes, eveniments culturaus, eca)”, comente era presidenta dera Entitat Municipau Descentralizada de Betren, Vanessa Fandiño.
08/02/2023