Notícies Veir istoric
Es tecnics esportius socorristes deth Palai de Gèu se formen en spinning e exercicis ipopressius entà ampliar era aufèrta d’activitats dirigides dera installacion
Era planificacion setmanau der equipament municipau ei centrada, sustot, enes corsi de natacion e patinatge sus gèu, mès tanben en activitats dirigides coma EFM, Aquasalut, hatha vinyasa iòga, iòga terapeutic, yin iòga e stretching
Pendent aguestes setmanes, es desparièrs tecnics esportius socorristes que trabalhen en Palai de Gèu de Vielha amien a tèrme ues jornades formatiues en spinning e exercicis ipopressius.
Actuaument, era installacion esportiua dispause de 3 tecnics esportius socorristes e 1 socorrista (aguest darrèr damb prevision de qu’ara longa tanben pogue èster tecnic esportiu socorrista). Er objectiu d’aguesta formacion ei ampliar era aufèrta qu’ara madeish s’impartís en Palai de Gèu.
Era planificacion e organizacion des servicis que s’aufrissen se centren, sustot, enes corsi de natacion e patinatge sus gèu qu’an lòc de deluns a diuendres. Atau madeish, tanben s’aufrissen activitats dirigides coma son: EFM (deluns e dimèrcles entàs 09:15), aquasalut (deluns, dimèrcles e diuendres entàs 10:15), hatha vinyasa iòga (dimars entàs 09:30 e 15:00), iòga terapeutic (dimars e dijaus entàs 11:00), yin iòga (dijaus entàs 09:30 e 15:00) e stretching (diuendres entàs 09:15).
“Gràcies a d’aguesti corsi formatius en spinning e exercicis ipopressius, es tecnics esportius deth Palai de Gèu aquerissen mès competéncies professionaus en naues activitats dirigides, que milhorarà eth servici qu’actuaument balham as nòsti usatgèrs”, comente eth dusau tinent d’alcalde e còsso d’espòrts de Vielha e Mijaran, Alberto López.
14/02/2023