Notícies Veir istoric
Er Ajuntament de Vielha e Mijaran adjudique eth projècte de milhora deth pati dera Escòla Garona de Vielha
Es òbres contemplen era milhora deth paviment e des barraments perimetraus deth pati, atau coma eth bastiment d’un camp de fotbòl 7 e eth marcatge d’ua pista de basquet
Er Ajuntament de Vielha e Mijaran ven d’adjudicar eth projècte d’adeqüacion e milhora deth pati de primària dera Escòla Garona de Vielha.
Uns trebalhs que son fòrça de besonh, pr’amor que bona part d’aguesta installacion se trape en un estat maumerenc e, per tant, s’actuarà ena primauera, entà qu’aguest ostiu dejà sigue prèst.
Per un costat, aguesta intervencion contemple era milhora deth paviment deth pati, pr’amor que bona part s’auie desprenut. Per tant, s’i tornarà a plaçar hormigon entà apariar es desperfèctes generadi peth pas deth temps.
Atau madeish, se cambiarà eth barrament perimetrau, pr’amor qu’er andàs metallic que i a en exterior ei trincat e damb grèus desperfèctes peth pas deth temps. Ara s’i plaçarà un reishat d’acer de 2 mètres de nautada e dessús un andàs de proteccion de 3 mètres de nautada damb hilat de nilon de 3 millimètres de diametre.
Ua auta des accions consistirà en bastiment d’un camp de fotbòl 7 d’èrba artificiau, qu’anarà dessús d’ua superficia d’hormigon. Un equipament fòrça demanat e que compde damb fòrça usatgèrs en nòste municipi.
Entà acabar eth projècte se realizarà eth marcatge e pintat des pistes poliesportiues, autant deth camp de bàsquet coma deth camp de fotbòl 7, e s’i plaçaràn es porteries de fotbòl, qu’anaràn anclades en paviment.
Eth conjunt d’aguest projècte de milhora e adeqüacion deth pati dera Escòla Garona de Vielha compde damb un pressupòst de 195.190,38€.
“A compdar d’aguest ostiu, Vielha compdarà damb un camp de fotbòl 7 en pati dera Escòla Garona, un equipament qu’ère fòrça demanat e que compde damb fòrça usatgèrs en nòsti municipi”, comente eth baile de Vielha e Mijaran, Juan Antonio Serrano, e ahig que “damb aguesta inversion melhoraram tot eth pati de primària dera Escòla Garona en tot suenhar as mès joeni deth municipi damb ues installacions que seràn disponibles pendent tot er an”.
15/02/2023